Prezidente Repúblika, José Ramos-Horta. Foto/Mídia GPR
Prezidente Repúblika, José Ramos-Horta hateten nia rona notisia kona-bá sidadaun estranjeiru husi Indonézia ne’ebé iha kartaun Eleitorál, no seidauk iha informasaun konkretu ruma, maibé haree iha vídeo sidadaun na’in-rua ema Timor-oan, maske hetan ona sidadania Indonésia ne’ebé deklara katak sira iha kartaun eleitorál.
Ramos-Horta hateten, Indonézia la permite dupla nasionalidade, la’ós hanesan iha Timor-Leste ne’ebé permite ema bele iha pasaporte rua ka tolu, Indonésia la permite entaun sira sidadaun Indonézia duni simu fali kartaun eleitoral Timor nian se mak fó, ne’e krimi sériu ida no Ministériu Públiku tenke halo investigasaun ho seriedade ba kazu ne’e.
Advertisement
“Ministériu Públiku tenke halo investigasaun tanba ne’e akuzasaun ida, alegasaun ida sériu tanba ne’e krimi eleitorál, krimi falsifikasaun dokumentu, ema balu kuitadu tama prizaun Becora, tanba falsifika dokumentu,” Prezidente Repúblika José Ramos-Horta bá jornalista sira iha Novo Turizmu, Díli, Sesta (19/05/2023).
Xefe Estadu hatutan Ministériu Públiku hanesan institutusaun Estadu ida independente no laiha ema ida mak bele halo intervensaun bá sira nia servisu tamba ne’e prosesu investigasaun tenke lao bá oin.
Foin dadauk hanesan Xefe Estadu fó mós posse ba Adjuntu Prokuradór na’in-haat, ida-idak ho nia área espesialidade para bele tane-metin Prokuradór Jerál.
Prokuradór Jerál ema ida di’ak nia mós iha situasaun balun mai hosi kotuk, halo Prokuradór Jerál ema barak kritíka hateten, politizadu partirilazadu mais ida ne’e hanesan ha’u koñese di’ak iha istória da vida nia iha korajen atu lori nia misaun iha Ministériu Públiku ho susesu no independente.
“Ha’u fiar investigasaun tenke bá oin, se lae dezakredita sira rasik, ema komesa lafiar justisa, tanba kuitadu Timoroan balu falsifika de’it dukumentu hetan prizaun,” Ramos-Horta subliña.