Bankada FRETILIN Sujere Remodelasaun bá Hadi’a Dezempeñu Governu

Hatutan.com, (09 Janeiru 2024), Díli– Bankada FRETILIN iha Parlamentu Nasionál (PN) fó hanoin katak Primieru-Ministru (PM) Xanana Gusmão iha kompeténsia atu halo remodelasaun hodi hadi’a dezempeñu servisu Governu nian tuir povu nia espetativa no  interese nasaun nian.

Lee Mós: Remodelasaun Importante Tuir Avaliasaun Dezempeñu Loron 120

Membru Bankada FRETILIN iha Parlamentu Nasionál (PN), Joaquim dos Santos. Foto/Tome da Silva.

Membru PN hosi  Bankada FRETILIN, Joaquin dos Santos Borululi, hateten remodelasaun ne’e kompeténsia Primeiru-Ministru nian bainhira nia halo avaliasaun no haree katak nia membru Governu balun la entende servisu no la fó prestasaun servisu di’ak bá vozibilidade Governativa nian bele halo remodelasaun.

“Primeiru-Ministru hanesan jestór bá Governu nia tenke hadi’a ninian Governu, remodelasaun bá di’ak tuir nian komprimisiu eleitorál ida ne’ebé la hatene ukun troka tiha, tanba povu fó fiar atu serbí povu ho ema ne’ebé iha kapasidade. Ema ne’ebé laiha kapasidade kuandu Primeiru-Ministru husu karik husu deskulpa dehan ha’u la iha kompeténsia ona,” Deputadu Joaquin dos Santos Borululi bá jornalista iha PN, Tersa (09/01/2024).

Iha sorin seluk membru bankada CNRT deputadu Patrocinio Fernandes dos Reis haktuir Primeiru-Ministru maka iha kompeténsia atu halo avaliasaun bá membru Governu sira.

“Ha’u laiha komentáriu bá asuntu remodelasaun, tanba Governu ida kompeténsia eskluziva Primeiru-Ministru ninian  ne’ebé Primeiru Ministru maka iha kompeténsia hodi halo avaliasaun baámembru Governu sira  ninia prestasaun  servisu,  dedikasaun buat sira ne’e hotu,  servisu espetativa refleta duni ba Governu ne’e iha  para atu responde bá preokupasaun públiku nin,” Deputadu Patrocinio Fernandes hateten.

Bankada CNRT nu’udár  sustenta Governasaun ida-ne’e, kuandu ko’alia Governasaun ne’e nia na’in maka Primeiru-Ministru, portantu Bankada CNRT  konserteza nia iha ninia pozisaun ida atu asegura no apoia  polítika tomak ne’ebé Primeiru-Ministru   hola   nu’udár desizaun Estadu no desizaun bà nasaun.

Jornalista Estajiária : Zita Menezes