CAC Sei Buka-Tuir Informasaun Kona-bá Tripulante Ró Berlin Ramelau-Nakroma Fa’an Billete $50

Hatutan.com, (24 Janeiru 2024), Díli—Comissão Anti Corrupção (CAC) liu hosi ekipa Unidade Informasaun no Seguransa (UIS) iha inisiativa hodi buka hatene kona-bá tripulante sira iha ró Berlin Ramelau ho Nakroma fa’an billete $50 kada viajen.

Ró Berlin Nakroma. Foto/Espesiál

“Ita seidauk halo konkluzaun ba ida-ne’e normalmente iha CAC ami iha unidade ida naran Unidade Informasaun no Seguransa. Sira mak atende liu informasoens hosi públiku kona-bá informasaun sira, hanesan dala barak ami nia investigadór sira ho inisiativa rasik halibur informasaun sira hosi parte hotu-hotu depois mak bele haree katak loos duni ka la’e akontese duni ho ema ko’alia ne’e ka la’e,” Diretór Investigasaun CAC, José Verdiál hateten iha edifísiu CAC, Faról, Kuarta (24/01/2024).

Lee Mós: Tripulante Ró Berlin Ramelau ho Nakroma Fa’an Mós Tiketi ho Folin US$ 50 Kada Viajen

Tanba ne’e, nia dehan, ekipa ne’e sei haree assaun sira ne’ebé mak tripulante sira halo ne’e prienxe elementus krime ruma ka la’e hanesan iha dokumentu balun haree katak, iha duni indísius bá krime ruma ne’e mak foin halo autoresepsaun hodi loke investigasaun.

Maibé, nia hatuatn, agora daudaun informasaun sira hanesan ne’e horseik mak foin sai, entaun ekipa inevestigadór sira sei haree no buka-tuir hodi hetene informasaun ida klaru depois mak bele rejista no mós presiza halo averiguasaun hodi buka hatene kle’an bá ida-ne’e.

“Se sira halo asaun ne’e krime no kabe bá kompeténsia CAC nian, automatikamenate ita halo auto partisipasaun hodi haruka bá Ministériu Públiku,” nia esplika.

Hakarak mós hato’o informasaun bá públiku katak, kualkér denúnsia ka informasaun ne’ebé mak tama iha CAC, ninia tratamentu la’o hanesan no hotu hotu-hotu sai prioridade, katak ema deskonfia iha aktu de korrupsaun iha ne’ebá automatikamente ekipa investigasaun halo kedan sira ninia servisu bá faze averiguasaun.

Iha Segunda 22 Janeiru 2024, Membru Parlamentu Nasionál (PN) hosi bankada PD, Maria Teresa Gusmão, deklara iha plenária katak, identifika irregularidade iha operasaun Ró Berlin Ramelau ho Nakroma, tanba durante ne’e tripulante sira iha ró rua ne’e fa’an mós billete bá pasajeiru sira ho folin $50 kada viajen.

Jornalista Estajiáriu: Lazaro Pereira Quefi