Quick Count Hosi Institutu Survei Oioin, Provizoriamente Prabowo-Gibran Manán Eleisaun Prezidensiál RI

Hatutan.com, (16 Fevereiru 2024), Díli—Eleisaun Prezidensiál iha Repúblika Indonézia (RI) ne’ebé realiza iha loron 14 fulan ne’e, rezultadu kontajen lais (Quick Count) ne’ebé halo hosi Instituisaun Survei oioin hatudu katak, provizoriamente kandidatu Prezidente no Vise-Prezidente Prabowo-Gibran manán ona iha provínsia hotu-hotu iha Indonézia.

Foto kandidatu Prezidente no Vise Prezidente Repúblika Indonézia 14 Fevereiru 2024. Foto repro hosi CNNIndonesia.

Iha publikasaun CNN Indonésia hatudu katak, rezultadu kontajen lais (quick count) eleisaun Prezidensiál 2024 ne’ebé halo hosi Institutu Survei oioin hatudu katak, Prabowo Subianto-Gibran Rakabuming Raka hetan mós votus barak liu iha illa Java.

Lee Mós: Aliansi Nasional Timor-Leste untuk Pengadilan Internasional Menolak Prabowo Kembali Berkuasa

Publikasaun ne’e mós hateten, maioria Institutu Survei sira hateten, Prabowo-Gibran manán iha provínsia hotu-hotu iha Indonézia tomak, maibé iha mós Provínsia balun kandidatu Anies Baswedan-Muhaimin Iskandar manán ho votus oitoan liu iha DKI Jakarta.

Alende ne’e, kandidatu hosi Ganjar Pranowo-Mahfud hetan votus oitoan liu iha provínsia sira iha illa Java nian.

“Sira nia votus ne’e tama iha kategoria barak iha Java Sentrál, maibé nafatin lakon ho kandidatu Prabowo-Gibran ho ninia diferensa númeru votus ne’ebé boot,” Hatutan.com sita publikasaun hosi CNN Indonesia.

Dadus sira ne’ebé publika hosi CNN Indonesia ne’e sita hosi rezultadu kontajen lais ka quick count tuir persentajen 99-100 votus ne’ebé tama iha loron 15 Fevereiru 2024.

Rezultadu hosi kontajen lais (quick count) ne’e la’ós kontajen ofisiál eleisaun prezidensiál 2024 tanba dadus ne’e hetan hosi sampel sentru votasaun sira no la’ós mós foti hosi sentru votasaun hotu-hotu iha Indonézia laran tomak.

Rezultadu ne’e sei konta ofisialmente hosi Komisaun Nasionál bá Eleisaun Indonézia nian ka KPU liu hosi rekapitulasaun hahú hosi nível sentru votasaun, postu administrativu, distritu, provínsia to’o nasionál tanba Komisaun Nasionál bá Eleisaun ne’e iha tempu másimu loron 35 dezde eleisaun ne’e hahú.*