Mozambique husu Timor-Leste Fahe Esperiénsia Jestaun Fundu Petrolíferu

Hatutan.com, (06 Jullu 2024), Díli- Prezidente Repúblika Mozambique, Jacinto Filipe Nyusi husu atu Timor-Leste partilla ho sira kona-bá esperiénsia jestaun bá iha fundu soberanu ka fundu petrolíferu.

Lee Mós: TL-Mozambique Asina MoU Tolu Inklui Esplorasaun Mina no Gás

Prezidente Repúblika Mozambique, Jacinto Filipe Nyusi simu Prezidente José Ramos-Horta ho parade militár iha Palásiu Prezidensiál iha Maputu, Sesta (05/07/2024). Foto/Mídia GPR

Prezidente Repúblika Mozambique hato’o asuntu ne’e hafoin hasoru malu ho Prezidente Repúblika Timor-Leste, José Ramos-Horta iha Palásiu Prezidensiál Maputu, Sesta (05/07/2024).

“Prezidente Repúblika Mozambique Jacinto Filipe Nyusi husu  Timor-Leste atu fahe mós esperiénsia bá sira kona-bá jestaun fundu soberanu ka fundu petrolíferu,” haktuir Prezidente Repúblika, José Ramos-Horta  ne’ebé Hatutan.com sita tuir komunikadu imprensa.

Timor-Leste nia indústria estrativas bá ne’e avansadu ona, tanba ne’e mak Xefe Estadu Mozambique husu atu Governu Timor-Leste forma ekipa konjunta téknika ida, bele bá fahe esperiénsia  setór jestaun fundu petrolíferu nian.

Prezidente Repúblika José Ramos-Horta mós husu Mozambique ne’ebé hanesan nasaun dahat iha organizasaun Cumunidade dos Países da Língua Portuguesa (CPLP), inklui mós nasaun membru CPLP sira seluk, atu loke ka harii Embaixada iha Timor-Leste, nune’e bele konsolida liután relasaun no kooperasaun entre estadu membru sira.

Iha enkontru bilaterál  Prezidente Repúblika José Ramos-Horta no nia omólogu Prezidente Mozambique Jacinto Filipe Nyusi sai mos testemuña ba asinatura akordu kona-bá Memorandu Entendimentu entre Governu rua, hodi estabelese kooperasaun iha área importante tolu hanesan estabelesimentu mekanizmu permanente bá konsulta polítika diplomátika, Memorandu ida ne’e téknikamente sei halo hela diskusaun, daruak nian kona-bá ensinu superior, siénsia no teknolojia nian, no ikus liu memorandu entendimentu ba esplorasaun mina no hidrokarbonetus, inklui iha esplorasaun ba mina no gás (Hidrokarbonetus no Mina).

Enkontru bilaterál Prezidente Mozambique, Jacinto Filipe Nyusi ho Prezidente José Ramos-Horta iha Palásiu Prezidensiál iha Maputu, Sesta (05/07/2024). Foto/Mídia GPR

Akordu ne’e asina entre Ministru Negósiu Estranjeiru no Kooperasaun Timor-Leste Bendito dos Santos Freitas ho Ministra Negósiu Estranjeiru no Kooperasaun Mosambike, Verônia Mocamo.

Asuntu seluk ne’ebé ko’alia mós mak iha área edukasaun, saúde, agrikultura, dezenvolvimentu kapital umanu, inklui kooperasaun multilateral iha nível Nasoins Unidas no organizmu multilateral sira seluk ne’ebé Timor-Leste ho Mosambike bele tulun malu.

Remata enkontru bilateral  Xefe Estadu Ramos-Horta ho delegasaun  mós hala’o vizita bá Monumentu Nasional Eroi sira iha Sidade Sentral Maputo, hodi fó omenajen bá eroi nasional Mozambique nian.

Vizita Estadu Prezidente Repúblika José Ramos-Horta nian ba Mozambique hodi atende ba konvite husi Xefe Estadu Mozambique Filipe Jacinto Nyusi.

Jornalista : Vito Salvadór