IGE-ADI Sei Oferese Formasaun bá Operadór Ekipamentu Pezadu

Hatutan.com, (29 Jullu 2024), Díli—Instituto Gestão Equipamento Apoio Desenvolvimento Infraestrutura (IGE-ADI) iha ona planu atu fó formasaun bá operadór Timoroan sira hodi bele hasa’e sira nian koñesimentu kona-bá operasaun bá ekipamentu pezadu tuir padraun ne’ebé iha.

Kompañia internasionál Autozone ne’ebé manan tenderizasaun hodi sosa ekipamentu pezadu 15 realiza serimónia entrega ba IGE.IP no simu direta hosi Primeiru Ministru Taur Matan Ruak iha edifísiu IGE.IP, Colmera, Díli, Segunda (29/08/2022). Foto/Hatutan.com.

Planu ne’e IGE-ADI aprezenta ona bá Komisaun E ne’ebé trata asuntu Infraestrutura iha Parlamentu Nasionál (PN), segunda (29/07/2024).

Lee Mós: Ekipamentu Pezadu Hosi IGE Normaliza Ona Irrigasaun Manatuto-Laclo

Prezidente IGE-ADI, Ana Paula da Cruz hateten, planu ne’e aprezenta ona bá PN atu bele iha koñesimentu.

“Ami klasifiká iha auto-risku bá operadór sira. Entaun IGE-ADI mak tenki fó formasaun, primeiru tanba IGE-ADI iha mákina Estadu, nune’e tenke iha formasaun bá sistema tomak. Ami mós sei fó sertifikasaun no lisensiamentu bá sira,” Ana Paula da Cruz hateten iha PN.

Planu ne’e  IGE-ADI  hamosu tanba dalabarak operadór balun mai hosi rai li’ur atu halo servisu iha rai laran no IGE-ADI tenki sertifika sira, entaun pelumenus reseita ne’e bá Estadu.

Nia mós la kontente tanba tinan rua-nulu bá kotuk ema sira ne’e tama mai halo de’it servisu no la lori reseita bá Estadu, afinal ida-ne’e bele fó reseita boot bá Estadu.

Tuir planu, formasaun ne’e sei realiza iha rai laran no IGE-ADI sei prepara konsultan ho treinadór hosi Austrália hodi fó formasaun.

Iha fatin hanesan, Prezidente Komisaun E, Deputadu Marcos Xavier hateten Komisaun E konkorda no rekomenda bá IGE-ADI tenki haree lai Lei ne’ebé mak atribui bá sira.

Alende ne’e PN mós husu atu haree  IGE-ADI  nia kompeténsia ne’e to’o iha ne’ebé,  no PN konkorda ho sira nia planu atu labele gasta de’it osan maibé sira mós iha retornu atu hatama osan bá kofre Estadu.

Jornalista Estajiária: Zita Menezes