Hatutan.com, (11 Juñu 2026), Díli-Tribunál Judisiál Primeira Instánsia Díli (TJPID) aplika prizaun preventive ba arguidu na’in-rua ne’ebé alega komete kazu hadau karteira iha área Praia dos Coqueiros, Díli, foin lalais ne’e.

Lee Mós: PR Horta Ezije Governu Fó Atensaun Bá Sentru Reabilitasaun Juvenil

Arguidu na’in-rua ne’ebé komete kazu naok iha Díli laran to’o rezulta vitíma lakon vida. Foto/PNTL

Insidente ne’e rezulta vitíma ho naran istimadu Nadine lakon vida no nia bin rasik sofre kanek todan no halo tratamentu intensive iha Ospitál Nasionál Guido Valadares (HNGV).

Liu husi despaisu Juis Ivan Patrocnio iha baaudénsia primeiru, Kinta (11/06/2026), aplika medida koasaun prizaun preventiva ba arguidu na’in-rua  ne’ebé Ministeriu Publiku (MP) promove krime roubu ne’ebé previstu iha artigu 253, no krime Ofensa Neglijente ne’ebé previstu iha artigu 148, ho krime omisidiu neglijente ne’ebé previstu iha artigu 140 husi Kodigu Penal Timor-Leste.

Iha despaisu Juiz Ivan Patrocenio katak medida prizaun preventiva ba arguidu na’in-rua, tanba konsidera iha indisiu forte ba krime ne’ebé Ministeriu Públiku (MP) promove mai iha Tribunál.

Iha alegasaun Ministériu Públiku (MP) ne’ebé reprezenta husi Prokuradór Aderito Tilman husu Tribunál atu aplika medida koasaun  prizaun preventiva ba arguidu na’in-rua. Maibé Defensór Publiku Fernando de Carvalho ne’ebé fó asisténsia legal ba arguidu na’in-ru, husu Tribunál tetu atu aplika medida ba arguidu na’in-rua.

Hafoin despaisu Tribunál nian ne’e, autoridade seguransa lori  arguidu na’in-rua ba kumpre prizaun preventive iha Prizaun Becora.

Arguidu na’in-rua ne’e, alegamente naok karteira iha área Praia dos Coquiros iha  kalan 07 fulan-Juñu 2026, hodi rezulta Nadine lakon vida no nia bin hetan kanek todan.

Autoridade seguransa kaptura  na’in-rua iha BTN  Tasi-Tolu ho prova krime motór ida no tuir informasaun polísia nian katak suspeitu na’in-rua ne’e envolve iha grupu NAHAK (Naok Hakmatek).

Jornalista: Juvinal Cabral dos Santos