Justisa & Krime
Kazu Osan Millaun $3, Tribunál Aplika Prizaun Preventiva bá Nijerianu Na’in-rua ho Timoroan ida
Hatutan.com, (31 Jullu 2024), Díli-Tribunál Judisiál Primeira Instánsia Dili (TJPID) liuhosi despaxu ikus, deside aplika medida koasaun prizaun preventiva bá Nijerianu na’in-rua ho inisiál VD, USN ho arguidu Timoroan ida ho inisiál FJFSdS.
Arguidu sira partisipa iha julgamentu iha Tribunál Díli, Kuarta (31/07/2024). Foto/Elio dos Santos da Costa
Iha tribunál nia despaxu ikus ne’e, aplika mós medida koasaun aprezentasaun periódika bá Arguidu AJFLDJS no DODSFF, iha ne’ebé tenke aprezenta aan iha estasaun ka eskuadra Polísia sira ne’ebé besik.
Iha audiénsia interrogatóriu judisiál, Sábadu foin lalais, Ministériu Públiku promove arguidu sira ho krime tolu mak hanesan, Brankeamentu Kapitál (Artigu 13), Burla Informátika (Artigu 268) no Asosiasaun Kriminoza (Artigu 188) Lei Kódigu Penal Timor-Leste).
Audiénsia primeiru interrogatóriu ne’e hala’o durante loron lima nia laran, hosi Sábadu to’o Kuarta, 31 fulan-jullu 2024, tanba loron primeiru arguidu Nijerianu na’in-rua enfrenta iha lingua, iha ne’ebé presiza halo tradusaun hosi lingua Inglés bá Tetum, no Tetum bá Inglés, ho nune’e prosesu ne’e rasik tenke la’o to’o kalan.
Parte advogadu sira mós halo rekerementu bá Tribunál atu rekolla tán osan isin-lolon (cash) $100,000.00 ne’ebé ninia kliente sira asegura iha rezidénsia privadu lokalizadu iha Munisipiu Liquiça, no Díli iha área Fomentu I. Tanba ne’e maka prosesu sira ne’e hotu tenke lori to’o tempu kalan.
Hafoin rona tiha parte hotu, Kuarta (31/07/2024), tuku 19:30 kalan ne’e, Tribunál hasai despaxu ikus hodi deside medida koasaun prizaun preventiva ho aprezentasaun periódika bá arguidu sira.
Advogadu privadu Octavio Cardoso ne’ebé fó asisténsia bá Arguidu Timoroan nai’n-tolu, hatete katak, andamentu prosesu bá iha dilijénsia primeiru interrogatóriu ne’e, sira hala’o durante loron lima, no hosi prosesu ne’e, prodús buat balu iha dilijénsia ida ne’e. Purtantu haree bá faktu hotu ne’ebé maka prodús nia parte konsidera hanesan mós segredu de justisa, katak prosesu ida ne’e dilijénsia.
“Relativamente ho despaxu ne’ebé mak Tribunál aplika medida koasaun sira na’in-lima maka, na’in-tolu prizaun preventiva, no na’in-rua aprezentasaun periódika fulan-ida dala-rua. Prizaun preventiva bá sidadaun Timoroan ida inisiál FJFSdS ho estranjeiru na’in-rua, VD no SUN,” Advogadu Octávio Cardoso informa bá Jornalista sira iha Tribunál, Díli.
Advogadu Ocatávio Cardoso dehan, hafoin haree iha dilijénsia, defeza iha provas balu ne’ebé maka atu rekorre, tanba tuir nia, desizaun ida ohin ne’e la’ós despaxu ikus ona. Tanba ne’e nia parte sei hatama rekursu bá Tribunál hodi kontesta desizaun ne’ebé atribui bá nia kliente FJFSdS.
“Nafatin defeza mantein nia pozisaun katak, sei rekorre bá despaxu refere. Ha’u nia kliente iha na’in rua, DSM ho AFS mak aprezentasaun periódika, ida bá prizaun preventiva,” Octávio Cardoso hateten.
Hatán kona-bá too bainhira parte adovagadu atu hatama rekursu, nia dehan, haree bá prazu, tanba dilijénsia no haree mós bá iha tempu lívre barak loos, komesa ohin, sira ferias judisiais, tanba ne’e tarde liu iha bain-rua (Sesta, 03 Agostu 2024) nia sei instaura prosesu bá Tribunál.
Iha fatin hanesan, Defensór Públiku Estaquio Guterres hatutan, iha prosesu ida ne’e arguidu na’in-rua ne’ebé maka hosi estranjeiru, nia ho Defensór Francisco maka halo defeza bá arguidu na’in-rua, inklui Defensóra Laura ne’ebé maka fó defeza bá iha arguidu DODSFF ne’ebé maka agora daudauk Tribunál hatún despaxu libertasaun bá nia.
“Maibé, arguidu na’in-rua husi estranjeiru, Tribunál aplika prizaun preventiva. Razaun tanba, krime ne’ebé maka imputa bá sira, Tribunál rona mós pedidu hosi ministériu públiku katak, iha provas, indísiu ida forte, ho ida ne’e maka aplika prizaun preventiva bá iha arguidu na’in-rua,” tenik Estáquio Guterres.
Biar nune’e, Defensór Estáquio dehan, hanesan defeza, sira sei halo koordenasaun didi’ak, atu nunee bele hatama rekursu bá desizaun ida ne’ebé Tribunal hasai hasoru sira nian kliente, tanba iha prazu legal loron 15 bá atu submete rekursu.
Audiénsia Primeiru Interrogatóriu Judisiál ne’e prezidente hosi Juiz Prosesu Afonso Carmona, Ministériu Públiku (MP) reprezenta hosi Prokuradór João Marques, Pedro Baptista no Domingos Gouveia Leite. Arguidu sira hetan Asisténsia Legál hosi Advogadu Privádu Octávio Cardoso, Marino da Cruz, Rui Mendonça, inklui Defensór Públiku Estáquio Guterres.
Reprezentante Kompañia ENLGG Singapura PT.LTD ne’ebé mak manda osan mai Kompañia SIX ONE Community Asia PT.LTD, reprezenta hosi Advogadu Privádu Bedigno Guterres.
Arguidu na’in-lima ne’e Policia Ciêntífica e de Investigação Criminal (PCIC) ho Komunidade Intelijénsia, halo detensaun ka kapturasaun iha loron 25 fulan-Jullu 2024 iha área jurisdisaun Díli tanba envolve iha rede ida de’it, utiliza Kompañia Six One Community Asia Unipessoal Lda ninia konta bankária, hodi dada ‘naok’ tiha osan ho valór Millaun $3, hosi totál osan Millaun $42 ne’ebé transfere hosi Kompañia ENLGG Singapura PT.LTD ne’ebé loloos ne’e tenke tama iha Kompañia SIX ONE Community ninian konta bankária iha Dili, Timor-Leste. Infelizmente, kompañia ne’e ninia konta bankária hetan hack tiha hosi Nigerianu na’in-rua liuhosi modus operande, e-mail.
Jornalista: Rogério Pereira Cárceres