Reportajen: Maria Angelita Sandi Belo

 Hatutan.com, (28 Setembru 2026) Díli– Banku Dezenvolvimentu Aziatiku (ADB sigla inglés) kompromete kontinua apoiu dezenvolvimentu Timor-Leste iha área infraestrutura, fornese servisu iha área saúde no edukasaun.

Diretór ADB Artur Andrysiak.

“ADB  kompromete atu kontinua apoia ajenda dezenvolvimentu Timor-Leste. Ami nia apoiu foka ba dezenvolvimentu infraestrutura importante no servisu báziku, dezenvolvimentu setór privadu, no fornese servisu iha área saúde no edukasaun,” diretór ADB Artur Andrysiak  informa ba jornalista sira iha Palásiu Governu, Segunda (28/09/2026).

ADB servisu iha Timor-Leste husi tinan 2002. Husi tempu ne’ebá,  fó apoiu iha forma oioin, inklui empréstimu ho montante bo’ot. Maibé, buat ne’ebé importante tebes mak doasaun no asisténsia téknika atu apoia dezenvolvimentu nasaun nian

Apoiu ADB ne’ebé importante tebes ba Timor-Leste mak dezenvolvimentu infraestrutura bázika, inklui hadi’a konetividade, liu-liu rede estrada sira.

“Iha enkontru ohin, ha’u hetan onra atu diskute ho Primeiru-Ministru kona-ba oinsá ami bele fó apoiu di’ak liután ba Timor-Leste, saida de’it mak ami hala’o hela iha área kooperasaun oi-oin, no mós husu orientasaun husi Primeiru Ministru kona-ba buat sira seluk ne’ebé ami presiza halo atu apoia dezenvolvimentu nasaun nian,” Diretór ADB hateten hafoin enkontru ho PM Xanana Gusmão iha Palásiu Governu.

Buat importante seluk ne’ebé ami ko’alia mak apoiu ADB ba prosesu Timor-Leste nia asesu dahuluk ba ASEAN. Agora, apoiu orienta ba prosesu integrasaun Timor-Leste iha ASEAN. ADB apoia instituisaun oi-oin no servisu hamutuk ho órgaun governu sira atu ajuda prosesu ne’e.

“Ami mós apoia dezenvolvimentu infraestrutura prinsipál balun antes realiza Cimeira ASEAN iha Timor-Leste iha tinan 2029. Apoiou ne’e inklui kooperasaun ho parseiru dezenvolvimentu sira seluk iha dezenvolvimentu aeroportu, no esforsu atu hametin liután infraestrutura transporte iha nasaun ne’e,” nia konklui. (*)