Polítika
OJE 2025 Billaun $2,6 Aloka Maka’as iha Saláriu Vensimentu
Hatutan.com (05 Novembru 2024), Díli– Parlamentu Nasionál liuhosi Xefe Bankada PLP, Maria Angelina Sarmento, konsidera Orsamentu Jerál Estadu (OJE) 2025 ho montante billaun $2,6 aloká maka’as liu iha salariu vensimentu.
Xefe Bankada PLP iha PN, Maria Angelina Sarmento. Foto/Tome da Silva.
“Ami haree katák orsamentu ne’ebé aloká bá tinan 2025 ho montante billaun $2,6 itá bá ami ne’e boot demais. Ita mós tenke konsiénte katák ita agora hasoru presifisiu fiskál rai-naruk husi ita osan fundu petroliferu 2036 , ne’e atu dehan katák IX Governu nia pedidu nasionál mai Parlamentu Nasionál atu halo levantamentu osan fundu petroliferu ne’e la prudenti,” Deputada Maria Angelina Sarmento ba Hatutan.com iha PN, Tersa (05/11/2024).
Reprezentante povu ne’e hateten ukun ida agora ne’e asumi responsabilidade rai hela rezerva husi fundu petroliferu bá jerasaun tuir mai ida-ne’e prová liuhosi OJE ne’e la finansia ba despeza kapitál dezenvolvimentu no infraestrutura nian ne’ebé hatuur iha lei fundu petroliferu nian.
Katák kuandu foti liu RSE 3% ne’e atu halo investimentu ba dezenvolvimentu ba longu prazu nian, maibé afinál halai fali ba trensferénsia públika mak boot ho persentajen kuazé 33% no mós ba saláriu vensimentu ne’ebé boot la halimar, ho diferénsia entre OJE 2024 iha OJE 2025 purvolta millaun 21 ba saláriu vensimentu.
Nia mós haktuir tuir loloos orsamentu ne’e finansia ba investimentu atu bele garantia iha futuru mai bele fó reseita foun ba estadu atu nune’e bele hamenus foti fundu petrolifera maibé finasia de’it despeza korentis.
“Governu ida-ne’e ukun emploi ka emprega ema barak entaun fatin laiha tenke rakuta de’it osan fundu petroliferu atu fó han ita-nia funsionáriu sira ne’ebé mak tama foin daudaun iha tinan kotuk sai hanesan funsionáriu temporariu talvez rekruta hotu ba iha ne’ebá para hamenus osan bens servisu tau fali iha saláriu vensimentu atu reponde ba funsionáriu sira ne’e la prudenti no laiha responsabilidade moral atu garante sustentabilidade fundu petroliferu ba jerasaun sira tuir mai,” Nia hatutan.
Iha sorin seluk Deputadu Bankada FRETILIN Antoninho Doutél Sarmento hateten Bankada Opozisaun haree montante orsamentu OJE sira ne’e hotu, aban hahú insisiu ba loke sesaun debate ba OJE 2025, sé Governu uluk tau billaun $1 liu no ohin sa’e ba billaun $2,6 sira sente katák sira hakarak halo buat ruma di’ak.
“Ita sei haree di’ak ne’e husi ne’ebé para ita garante katák osan sira ne’e osan povu nian sé hasai ho montante boot maibé tenki iha ninian indikadór serteza ida para atu garante ninian dezenvolvimentu atu hasa’e produtividade iha rai laran atu garante dezenvolvimentu ekonomiká ida di’ak liu,” Deputadu Antoniho Doutel Sarmento hateten.
Jornalista Estajiária: Zita Menezes