Horta Afirma Fujitivu Arnolfo Teves Jr La Prienxe Rekizitu Azíliu Polítika iha Timor-Leste

Hatutan.com, (12 Novembru 2024), Díli- Prezidente Repúblika (PR), José Ramos-Horta, deklara Fujitivu Arnolfo Teves Jr  ho nasionalidade Filipina la prienxe rekizitu atu hetan azíliu polítika iha Timor-Leste.

Lee Mós: Tribunál Seidauk Notifika Fujitivu Teves Jr Atu Submete Fali bá Rejulgamentu

Prezidente Repúblika José Ramos-Horta hato’o deklarasaun ne’e hodi hatan ba jornalista sira relasiona ho enkontru internal ho Sekretáriu Estadu Justisa hosi Filipina nian iha fulan hirak ba  ne’ebé taka ba média sira.

Prezidente Repúblika, José Ramos-Horta tau ai-finan iha Santa Krús hodi komemora Masakre Santa Krús bá dala-33, 12 Novembru 1991-2024. Foto/Elio dos Santos da Costa

Xefe Estadu hateten lolos seitór Justisa iha Timor-Leste mak bele hatan ba assuntu ne’e, maibé ho situasaun ne’ebé iha halo seitór Justisa iha Timor-Leste mak lakon kredibilidade.

“Ita atu tama ASEAN, maibé setór Justisa iha kazu ida ne’ebé Governu membru ida husi ASEAN halo akuzasaun liu ona husi INTERPOL  no INTERPOL halo mandadu kapturasaun no seitór Justisa ita bele hateten la book an, ida-ne’e hatun Timor-Leste nia kredibilidade no impaktu ba ita-nia interese nasionál no se mak responsavel ba id- ne’e mak Prezidente Tribunál Rekursu no konsekuénsia sira nia mak tenke esplika,” Prezidente Repúblika José Ramos-Horta ba jornalista sira iha semitériu públiku Santa Krús,  Díli, Kuarta (12/11/2024).

Xefe estadu afirma sira husi Filipina husu atu lori fila no tenke haruka fila fujitivu Arnolfo Teves Jr tamba Timor-Leste la fó azíliu no fujitivu ne’e la prienxe rekizitu  nu’udar refujiadu polítiku.

Ramos-Horta subliña liután katak fujitivu Arnolfo Teves Jr la prienxe rekizitu azíliu polítiku iha Timor-Leste la’ós tamba Timor-Leste no Filipina seidauk iha akordu estradisaun.

“Akordu estradisaun iha ka la iha, nia (fujitivu Arnolfo Teves Jr) la kumpre rekizitu atu hela iha Timor-Leste. Dala-barak ema mai iha, aeroportu tamba de’it problema visa duni sai. Agora ema ida ne’ebé  akuzadu krime bo’ot, la iha razaun atu hela iha ne’e,” Ramos-Horta afirma.

Fujitivu Arnolfo “Arnie” Alipit Teves Jr, hetan red notice hosi Organizasaun Internasionál Polísia Kriminál (INTERPOL, sigla inglés) tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia-feen no oan-feto.

Arnolfo Teves Jr sai hanesan autór bá kazu omisídiu oioin iha provínsia Negru Oriental, Filipina.

Hanesan informa ona katak durante hela iha  Díli-Timor-Leste,  Arnolfo Teves Jr halo esforsu oioin atu bele hetan azíliu polítika, inklui halo komunikasaun ho figura importante balun iha Timor-Leste  atu bele fasilita nia tama Eropa, maibé esforsu sira-ne’e la konsege no la hetan aseitasaun

Antigu membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9), inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Jornalista: Vito Salvadór