MACLN Enkoraja Veteranu Sira no Públiku Submete Reklamasaun ba CCLN Kada Munisípiu

Hatutan.com, (22 Janeiru 2025), Díli– Ministru Asuntu Kombatente Libertasaun Nasionál (MACLN, sigla portugés) Gil da Costa Monteiro “Oan Soru”, enkoraja veteranu sira no públiku ne’ebé la satisfeitu ho lista editál veteranu nian ne’ebé publika ona atu bele submete reklamasaun ho evidénsia sira  ba Konsellu Kombatente Libertasaun Nasionál (CCLN) iha kada munisípiu.

Lee Mós: PLP Kestiona Lista Editál Veteranu Sira-Nian Ne’ebé Publika

Ministru Asuntu Kombatente Libertasaun Nasionál (MACLN, sigla portugés) Gil da Costa Monteiro “Oan Soru”. Foto/Tome da Silva

Ministru Gil da Costa Monteiro “Oan Soru” hateten lista taka sai ona, lei no regra klaru ona, katak  iha loron 60 hafoin lista edital naran veterani sira rejistu tinan 2009 publika, bainhira la klaru ka sente sala bele reklama  ka kontesta hodi submete iha CCLN kada munisípiu.

“Reklamasaun sira tenke tau hotu iha CCLN  kada munsípiu mak lori mai MACLN la’ós ida-idak lori ninian mai. Verifikasaun halo iha Munisípiu sira entaun reklamasaun mós tenke halo iha ne’ebá, la autoriza ema 92.000 resin ne’e ida-idak atu mai hatama ninian reklamasaun,” Ministru Gil da Costa Monteiro “Oan Soru” bá Jornalista sira hafoin Reuniaun Konsellu Ministru  iha Palásiu Governu, Kuarta (22/01/2025).

Nia hateten MACLN  atu gaña ema ida nian fiar MACLN halo tuir lei de’it, lei hateten saida husi ne’ebé halo tuir ne’e de’it.

“Halo tiha uluk reklamasaun mak ita bele rezolve.  Seidauk halo reklamasaun ne’e keta dehan uluk la rezolve, ministériu nafatin la’o tuir lei de’it, la halo buat ida tuir ema ida-idak nian gostu,” Nia hateten.

Jornalista Estajiária: Zita Menezes