Ministériu Interiór Sei Rekruta Membru Foun PNTL Na’in-500

Hatutan.com, (05 Fevereiru 2025), Díli- Governu liu husi reuniaun Konsellu Ministru, Kuarta (05/02/2025), aprova projetu Rezolusaun Governu nian, ne’ebé aprezenta husi Ministru Interiór, Francisco Guterres, hodi define nesesidade rekrutamentu iha tinan 2025 ba Polísia Nasionál Timor-Leste (PNTL) no autorizasaun ba abertura konkursu públiku ba admisaun iha Kursu Formasaun Ajente no Kursu Formasaun Ofisiál.

Lee Mós: MI-PNTL Avalia Implementasaun Prioridade Lima bá 2023-2028

Serimónia aniversáriu PNTL iha Bairru-Pité Díli, Kuarta (27/03/2024). Foto/Dok.Elio dos Santos da Costa.

Tuir komunikadu ne’ebé Hatutan.com asesu husi Gabinete Ministru  Prezidénsia Konsellu Ministru, hateten medida ida-ne’e ho objetivu atu reforsa pesoál PNTL, hodi garante kapasidade operasionál ne’ebé boot-liu no prezensa polísia ne’ebé efisiente liu iha teritóriu nasionál tomak. Rekrutamentu ba ajente no ofisiál foun sira sei posivel atu rezolve defisit atuál iha rekursus umanus, hadi’a nível patrullamentu no vijilánsia nian, atunune kontribui ba reforsu seguransa públika nian.

Nia objetivu mós atu promove renovasaun jerasionál hosi instituisaun, hodi asegura kontinuidade no modernizasaun estrutura polísia nian. Rekrutamentu ida-ne’e mós ho objetivu atu reforsa reprezentasaun PNTL nian, atu nune’e bele garante forsa polísia ida ne’ebé reprezenta liután iha diversidade nasionál, ne’ebé fundamentál atu estabelese relasaun konfiansa no proximidade ho komunidade oioin.

 Totál sei rekruta membru foun hamutuk na’in-500, ne’ebé 400 sei tama iha Kursu Formasaun Ajente no 100 iha Kursu Formasaun Ofisiál.

 Jornalista: Vito Salvadór