Molok Halo Eviksaun iha Semana Oin, SEATOU Vizita Komunidade Kuluhun To’o Becora

Hatutan.com, (11 Fevereiru 2025), Díli –  Ekipa konjuntu servisu Alargamentu sidade Dili ne’ebe lidera hosi Sekretáriu Estadu Asuntu Toponímia no Organizasaun Urbana (SEATOU), Tersa (11/02/2025), hala’o vizita ba Postu Administrativu Kristu Rei, Munisipiu Díli hahú hosi Suku Kuluhun to’o terminal Becora atu haree komunidade sira-nia situasaun no kondisaun molok semana oin halo eviksaun.

Lee Mós: Fevereiru, SEATOU Hasai Komunidade Hela Besik Estrada Ibun Kulu-hun To’o Fatu-ahi

Ekipa konjunta kompostu hosi SEATOU, MOP ho PNTL no F-FDTL halo vizita ba haree fati nsira ne’ebé okupa espasu públiku molok eviksaun iha semana oin. Foto/Tome da Silva

Ekipa konjuntu kompostu hosi Sekretária Estadu Asuntu Toponímia no Organizasaun Urbana (SEATOU) Ministériu Obras Públiku, Ministériu Interior liu hosi PNTL no F-FDTL no ministériu relevante sira seluk hodi hare de’it situasaun no kondisaun.

“Ami mai atu haree komunidade sira-nia vontade rasik koopera ho Estadu atu nune’e bele hala’o ita-nia servisu tuir tempu ne’ebe mak ita deside ona. Ami halo vizita mai iha ne’e. Semana oin mai ekipa pazadu se sobu daudauk ona hahú hosi Suku Kuluhun tuir marka ne’ebe tau ona,” Sekretariu Estadu  Germano Santa Brites Dias hateten ba jornalista sira.

Tuir observasaun iha terrenu katak molok eviksaun no aplikasaun despeza administrativa ba espasu uma sira ne’ebé hatan marka, komunidade balun komesa sobu uluk ona nia sasán ne’ebé okupa espasu públiku.

“Sira ne’ebe mak hakarak uza sira nia besi, kalén sira ne’e na’in rasik sobu tiha ona sira muda ona ba kotuk no fó ona espasu para mákina pezadu sira mai iha semana oin,” Germano Santa Brites Dias hateten.

SEATOU nia vizita ne’e nota katak komunidade sira koopera tebes ho Estadu tanba sira rasik mak sobu sira-nia uma. Agora hein de’it semana oin mai haree ida ne’ebe mak komunidade sira sobu labele mak lori maki ne’e bele ba sobu.

Jornalista Estajiáriu :  Lazaro Pereira Quefi