Hatutan.com, (10 Janeiru 2025), Díli – Sekretáriu Estadu Asuntu Toponímia Organizasaun Urbana (SEATOU),  Germano Santa Brites Dias, Sesta (10/01/2025), halo enkontru aberta ho komunidade sira Suku Becora, Postu Administrativu Cristo Rei, Munisipiu Díli, hodi hato’o informasaun ba  komunidade sira kona-ba polítika Governu nian atu halo alargamentu estrada hosi área Kulu-hun to’o Fatu-ahi.

Lee Mós: Governu Sei Selu Indemnizasaun ba Uma Sira Ne’ebé Governu Sobu iha Fomentu II

Sekretáriu Estadu Asuntu Toponímia Organizasaun Urbana (SEATOU), Germano Santa Brites Dias halo enkontru aberta ho komunidade sira Suku Becora, Postu Administrativu Cristo Rei, Munisipiu Díli, Sesta (10/01/2025). Foto/Tome da Silva

Ba polítika ida-ne’e,  SEATOU aviza ba komunidade sira ne’ebé hela besik estrada ibun atu haloot sasan no sai ona hosi sira-nia hela fatin hahú fulan-Fevereiru 2025 tanba alagramentu estrada kilómetru 19.

SEATOU husu ba autoridade  lokál sira hotu atu servisu maka’as no fó hanoin nafatin ba komunidade hosi Kulu-hun, Becora to’o Fatu – ahi hodi koopera atu lori nasaun ne’e ba dezenvolvimentu.

SEATOU fó tempu fulan ida hahú hosi loron 10 fulan-Janeiru  to’o  loron 10 fulan-Fevereiru 2025 tanba ne’e iha pedidu ruma hato’o ema iha instituisaun importante rua; Ministériu Obras Publika ho Diresaun Nasionál Teras no Propriedade (DNTP) atu bele rezolve.

Iha fulan kotuk, MOP halo ona levantamentu dadus tau ona númeru ba loja, uma privadu, kioske no baraka sira ne’ebe besik iha Estrada ibun tuir  tuir medida ne’ebé MOP notifika.

“Posto Administrativu Cristo Rei ita hahú hosi Ponte Maufelo ba kraik parte Kulu-hun, no Ponte Maufelo mai leten sei loke estrada ba sorin-sorin ba to’o iha Becora sei kona metru 19.

 Tuir dadus MOP foti ne’e iha balu kona metru ida no boot liu mak to’o metru 5 tanba ne’e dezenvolvimentu atu la’o, SEATOU husu komunidade  tenke koopera.

“SEATOU husu ba komunidade sira atu labele hatudu liman ba malu katak ema ida ne’e hetan barak liu ka ha’u nian la to’o, maibé se sente la di’ak no buat ruma la to’o ko’alia ho SEATOU depois ita buka dalan bele rezolve. Atu labele halo terus ita boot sira no labele halo terus ema seluk. Rai Estadu ita la ko’alia Governu, se selu de’it ba sasán privadu ita nian rai ita la selu,” Germano Santa Brites Dias hateten.

Nia esplika, ko’alia kona-bá lei ba rai privadu bele halo negósiu mas kuandu to’os demais pasiénsia tenke sobu tuir lei ne’ebe aplika para hotu-hotu la’o tuir nia dalan tanba SEATOU nia servisu la haree ba mau- alin, família no kore.

Jornalista Estajiáriu : Lazaro Pereira Quefi