Governu Aprova Lei Konkorrénsia Hodi Garante Protesaun ba Konsumidór sira

Hatutan.com, (26 Fevereiru 2025), Díli- IX Governu Konstitusionál liu husi sorumutuk Konsellu Ministrus, Kuarta (26/02/2025), aprova lei Konkorrénsia ne’ebé aprezenta husi Vise-Primeiru-Ministru, Ministru Koordenadór Asuntu Ekonómia no Ministru Turizmu no Ambiente, Francisco Kalbuadi Lay.

Lee Mós: Kuidadu Sosa Na’an Manu-Aten, Manu-Ain ho Ikan Liu Prazu

Vise-Primeiru-Ministru, Ministru Koordenadór Asuntu Ekonómia no Ministru Turizmu no Ambiente, Francisco Kalbuadi Lay partisipa iha reuniaun Konsellu Ministru, Kuarta (26/02/2025). Foto/Espesiál

Komunikadu ne’ebé Hatutan.com asesu husi Gabinete Ministru Prezidénsia Konsellu Ministrus , haktuir objetivu husi intervensaun lejizlativa ida-ne’e mak atu estabelese kuadru jurídiku ida ne’ebé adekuadu hodi regula prátika konkorrénsia iha Timor-Leste.

Lei Konkorrénsia ne’e ho objetivu atu kria ambiente emprezariál ida ne’ebé kompetitivu, promove efisiénsia merkadu, prevene prátika monopolista no anti-kompetitivu, no garante protesaun ba konsumidór sira, hodi aliña nasaun ho padraun internasionál sira ne’ebé estabelese hosi Organizasaun Mundiál Komérsiu (OMK) no Asosiasaun Nasoins Sudeste Aziátiku nian (ASEAN).

Governu mós delibera hodi autoriza Ministra Finansas lori Governu Timor-Leste nia-naran, hodi asina, Akordu Kontribuisaun Finanseira entre Repúblika Demokrátika Timor-Leste no Uniaun Europeia kona-ba Planu Asaun Multianuál ba Timor-Leste ba tinan 2021-2027, ho montante euro millaun 12 (besik millaun $12,6).

Tuir projetu ne’ebé aprezenta hosi Vise-Ministra ba Asuntu ASEAN, Milena Maria da Costa Rangel, Konsellu Ministrus mós delibera hodi autoriza proposta kompletas iha área servisu komérsiu no movimentu pesoas naturais, ne’ebé sei submete nu’udar proposta inisiál hosi Timor-Leste ba Sekretariadu ASEAN no Estadu Membru sira ASEAN nian.

Proposta hirak-ne’e halo parte iha prosesu negosiasaun ba adezaun Timor-Leste ba Akordu ASEAN nian kona-ba Servisu Komérsiu (ASEAN Trade in Services Agreement-ATISA) no Akordu Movimentu Pesoa Naturál ASEAN (ASEAN Movement of Natural Persons Agreement -MNP), iha ámbitu negosiasaun ba adezaun plena Timor-Leste nian iha ASEAN.

Jornalista: Vito Salvadór