Hatutan.com, (23 Outubru 2024), Díli–Autoridade Inspesaun no Fiskalizasaun Atividade Ekonómia, Sanitária no Alimentar, Institutu Públiku (AIFAESA I.P) prende hahan liu prazu (expire), hanesan na’an-aten no manu-ain iha loja SEARA, Díli.

Lee Mós: Bankada CNRT Husu AIFAESA Halo Supervizaun ho Rigor bá Hahán Liu Prazu

Na’an ho ikan sira ne’ebé liu prazu bainhira ekipa AIFAESA deteta iha loja SEARA, Díli, Kuarta (23/10/2024). Foto/Tome da Silva

Inspetór Jerál AIFAESA, I.P, Odete da Silva Viegas,  Kuarta (23/10/2024), informa ekipa AIFAESA simu informasaun ka keixa husi konsumidór sira ne’ebé  halo kompras iha loja SEARA  no identifika na’an manu-aten ho manu-ain liu ona prazu  ka  expire ona maibé sei fa’an.

“Hafoin simu informasaun ekipa AEFAESA,I.P halo kedan inspesaun no identifika duni katak iha na’an manu-aten ho manu-ain mak liu ona prazu no ida tan mak sira falsifika data produsan  2021 no data expirasaun 2022 ba fali 2024 ho 2025 ida-ne’e ita atu hateten katak sira komete infrasaun ne’ebé mak grave,” Inspetóra Jerál AIFAESA,I.P, Odete da Silva Viegas ba jornalista sira hafoin halo inspesaun ba loja SEARA ne’ebé lokaliza iha Pantai Kelapa, Díli.

Identifikasaun ida-ne’e, tuir Odete Viegas, atensaun ba komersiante hotu-hotu, katak dadaun ne’e loja ne’ebe identifikadu mak loja SEARA, ho nune’e ekipa AIFAESA sei halo servisu regular hodi identifika tan loja seluk.

Bainhira kompañia ida identifika halo infrasaun mak sei hetan sansaun, hanesan selu koima ka osan hahú hosi $250.00 to’o $1,000.00 to’o $2,000.00. Maibé, bainhira identifika kompañia balun mak kontinua komete infrasaun ne’ebe hanesan la taka dalan ba AIFAESA atu foti desizaun taka total sira-nia atividade.

“Ami hanoin katak se kompañia ka loja halo hatudu nafatin hahalok ne’ebe mak hanesan posibilidade AIFAESA bele taka, bele taka fulan-ida to’o fulan-tolu kuandu sira kumpre fali ona regra sira ne’ebé  AIFAESA  ka SERVE,I.P fó mak fóin bele hahú fali nia atividade negosiu,” Nia hateten.

 SEARA Prontu Simu Sansaun

Iha biban ne’e, Jerente loja SEARA, Engelbertus Babulu, rekoñese ho infrasaun ne’ebé sira komete no prontu simu sansaun husi órgaun reguladór atividade ekonómika ka parte kompetente (Governu).

“Ami mós labele nega tanba nia data 2021, 2022 agora ema kaer-tena ami mós labele nega, tanba ne’e risku ba sira ida ne’ebe konsumu na’an hirak ne’e.  Sansaun saida mak Governu atu fó ami simu,”  Engelbertus Babulu hateten.

Nia parte klarifika katak labele koalia buat tan ida tanba sasán hirak  ne’e liu prazu duni, hanesan na’an manu-aten, manu-ain ho ikan.

Jornalista : Leopoldina de Carvalho