PN Kontínua Kestiona Eletrisidade Mate Beibeik

Hatutan.com, (18 Marsu 2025), Díli– Membru Parlamentu Nasional (PN) kontinua preokupa no kestiona  ho kondisaun eletrisidade ne’ebé mate beibeik hodi estraga komunidade sira nia sasán eletrónika.

Lee Mós: Eletrisidade Mate-Lakan, Bankada CNRT ho PD Bolu Prezidente Komisaun Ezekutivu EDTL,E.P

Edífisiu EDTL,E.P iha Caicoli, Díli. Foto/Elio dos Santos da Costa

“Eletrisidade kalan-kalan mate hela de’it liu-liu iha área Comoro ne’e no tuir informasaun ne’ebé ha’u rona husi ema tékniku sira katak nia trafo ne’e ki’ik liu hodi nune’e eletrisidade iha parte Comoro to’o Tasi-Tolu kalan mate beibeik,” membru PN Sancia Tilman haktuir  iha nia intervensaun iha plenária, Segunda (17/03/2025).

Membru PN ne’e afirma iha  Domingu  kalan ne’e ahi mate liu tiha minutu-lima lakan fali  kuazé mate lakan dala-tolu hanesan ne’e, no estraga komunidade sira nia sasán eletróniku sira.

“Ha’u husu ministériu kompetente atu bele tau iha konsiderasaun hodi nune’e labele defikulta beibeik komunidade sira, tanba dala barak ona kuandu ahi-mate hanesan ne’e estraga komunidade nia  sasán eletróniku,” nia hateten.

Iha Fatin hanesan Prezidente Parlamentu Nasional (PPN), Maria Fernanda Lay mós preokupa ho problema ahi-mate beibeik tanba estraga hotu fasilidade servisu sira.

“Distintu Deputadu, ahi-mate ne’e mak konsekuénsia ita nian ekran ida-ne’e la funsiona ho di’ak tanba ahi-mate no implika bá ekipamentu eletróniku sira,” PPN Maria Fernanda Lay kestiona.

Vise-Ministru Asuntu Parlamentár Adérito da Costa Hugo haktuir mós nia parte lamenta tebes ho servisu Eletrisidade Timor Leste Empreza Públika (EDTL,E.P) tanba ahi-mate beibeik no estraga komunidade sira nia sasán eletróniku sira.

“Primeiru-Ministru orienta ministériu relevante sira atu haree Institutu Públiku sira hanesan EDTL,E.P no BTL,E.P ho sira seluk tán ne’ebé  hetan subsídiu 100% husi orsamentu estadu nian maibé sein hatudu atividade ida ne’ebé di’ak maske ho rejime salariál ne’ebé elevadu kompara ho entidade sira seluk,” Nia Afirma.

Jornalista Estajiária: Zita Menezes