Hatutan.com (14 Fevereiru 2025), Díli– Bankada Parlamentár CNRT ho PD, Sesta (14/02/2025), bolu prezidente komisaun ezekutivu Eletrisidade Timor-Leste, Empreza Publika (EDTL,E.P), Paulo da Silva ho nia estrutura ezekutivu hodi esplika kona-bá eletrisidade ne’ebé kontinua mate-lakan.

Lee Mós: Eletrisidade Mate-Lakan, Membru PN Sira Husu Prezidenti Komisaun Ezekutivu EDTL,E.P Rezigna Aan

Prezidente Komisaun Ezekutivu EDTl,E.P, Paulo da Silva. Foto/Zita Menezes

“Ami partilla ho Deputadu sira husi Bankada CNRT ho PD, bá ita-nia situasaun reál ligadu ho kondisaun funsionámentu enérjia elétrika iha Timor. Loos duni katák ita iha semana hira bá kotuk akontese udan-anin boot halo ahi mate iha fatin-fatin,” Paulo da Silva haktuir bá Jornalista sira iha PN.

Nia hateten preokupasaun públiku no membru PN sira nian pertinente hodi buka hatene loloos kauza hosi eletrisidade mate-lakan, ikus-ikus ne’e.

“Ami esplika bá Deputadu sira kona-bá kauzá sira no mós hato’o mós bá sira kona-bá planu asaun sira para depois halo intervenzaun liga ho avaria sira ne’e, no mós planu sira oinsá atu melloria ita-nia servisu eletrisidade iha Timor bá oin,” Paulo da Silva hateten.

Nia informa kauzá teknikú no naun teknikú haree kona-bá  fasilidade asesores sira ne’ebé tempu naruk balu presiza  troka, ulizasaun másimu fora husi kapasidade trafú sira ne’ebé mak instala ne’e parte husi teknikú sira ne’ebé presiza haree.

Aspektu naun teknikú mak haree hanesan dezastre naturál ne’ebé akontese iha semana hirak liubá  halo avaria lubuk ida bá poste eletrisidade  iha kapitál Dilí  no mós munisipíu sira.

Kona-bá ejijénsia membru PN sira nian husu atu Prezidenti Komisaun Ezekutivu  EDTL, E.P, rezigna aan,  Paulo da Silva hateten nia parte lakohi fó komentáriu bá aspektu politikú.

“Ha’u lakohi komentáriu kona-bá aspektu politiku, ha’u ema teknikú ko’alia kona-bá teknikú, buat ne’ebé la’ós husi aspektu teknikú, ha’u lako’alia tanba ne’e kabe bá politikú sira mak ko’alia,” Paulo da Silva afirma.

Kona-bá reseita ne’ebé EDTL,E.P halibur hodi kontribui ba kofre estadu iha tinan 2024 hamutuk  millaun $58-liu no reseita bá tinan 2025 seidauk rekolla dadus kompletu.

Jornlista Estajiária: Zita Menezes