Torre Tolu Harii Ba RTTL iha 2023 ho Kompromisu Finaliza Fulan-Neen Foin Atinje 97%

Hatutan.com, (15 Abríl 2025), Díli – Atu aumenta asesu informasaun ba komunidade sira iha teritóriu Timor-Leste ba  Rádiu Televizaun Timor-Leste, Empreza Públiku (RTTL,E.P), Governu anteriór liuhosi Ministériu Asuntu Parlamentár no Komunikasaun Sosiál   (MAPKOMS) estabelese akordu ho Empreza PT. Global Citra Tama hodi harii torre tolu ba RTTL,E.P.

Lee Mós: Hein Aprovasaun OR, SEKOMS Halo Averiguasaun bá Konstrusaun Torre no Edifísiu Foun RTTL,E.P

SEKOMS Expedito Dias Ximenes hamutuk ho ekipa tékniku ADN ho MOP halo inspesaun bá projetu torre iha Munisípiu Lautem, 07 Setembru 2023. Foto/Dok.

Torre tolu bá RTTL,E.P nu’udár parte ida hosi projetu dijitalizasaun RTTL,E.P ne’ebé  harii ida iha área Lalenu-Lospalos, ida harii iha Fleixa-Ainaro no ida seluk harii iha Oepo-Maliana.

Tuir kompromisu ne’ebé kontempladu iha akordu entre MAPKOMS ho Empreza PT. Global Citra Tama, katak projetu ho valor orsamentu millaun $1.4 ne’e nia durasaun tempu fulan-neen (6) sura husi loron asina akordu iha loron 24 fulan-Fevereiru tinan 2023.

Iha loron, 15 fulan-Abríl 2025, Hatutan.com konfirma progresu servisu projetu torre tolu ne’e nian ba Sekretáriu Estadu Komunikasaun Sosiál (SEKOMS) Expedito Dias Ximenes, klarifika katak projetu ne’e agora daudaun atinje ona 97%.

“Ohin, ha’u haruka ona tékniku sira atu aban ba ona fatin tolu ne’e tanba iha semana hirak liubá sira fó relatóriu mai katak progresu to’o ona 97% ne’ebé agora tékniku sira ba verifika  atu to’o ona 100 % ka lae,” Exepdito Dias Ximenes hateten iha Palásiu Governu.

Nia informa mós katak tinan ida-ne’e  SEKOMS sei halo tan torre rua; ida sei tau nafatin iha Lospalos no  ida seluk mós sei tau iha Ermera.

Nia hateten, torre tolu ba RTTL, E.P ne’e nudar projetu kotinuasuan husi Governu da-ualu nian atu alarga RTTL nia kobertura iha territóriu Timor-Leste laran tomak tanba ne’e Governu da-sia  haka’as án hodi halo esforsu hotu nune’e konstrusaun to’o ona 97 %.

Tuir planu Governu da-sia nia mandatu sei halo torre 12 iha Timor-Leste atu bele alarga kobertura RTTL nian mas molok atu halo torre primeiru se halo uluk estudu viabilidade atu bele harii torre ne’e  tanba  agora RTTL nia kobertura iha Timor=-Leste foin atinje 58%.

Fó hanoin fali katak projetu harii torre-tolu (3) ho uma-rua (2) gasta orsamentu Estadu ho montante millaun $1.4, ne’ebé Ministériu Asuntu Parlamentár no Komunikasaun Sosiál (MAPKOMS) mak implementador.

Konkursu públiku bá projetu harii torre-tolu (3) ne’e halo iha Komisaun Nasionál Aprovizionamentu (CNA, sigla portugés) no MAPKOMS simu nia rezultadu hodi ikus mai asina kontratu servisu ho empreza Global Citra Tama hosi Indonézia.

Jornalista Estajiáriu: Lazaro Pereira Quefi