Hatutan.com, (21 Agostu 2023), Díli—Sekretáriu Estadu Komunikasaun Sosiál (SEKOM) forma ona ekipa ida atu tun bá terrenu hodi halo averiguasaun bá prosesu konstrusaun edifísiu foun Rádiu Televizaun Timor Leste (RTTL,E.P) no Torre, ne’ebé tuir planu sei realiza depois de Aprovasaun Orsamentu Retifikativu.

Sekretáriu Estadu Komunikasaun Sosiál (SEKOMS), Expedito Dias Ximenes. Foto/Elio dos Santos da Costa.

“Sei hein Orsamentu Retifikativu aprova mak ita foin ba halo averiguasaun. Ami la bá halo inspesaun maibé averiguasaun signifika atu ba haree fila-fali projetu konstrusaun edifísiu foun RTTL,E.P no Torre sira bá RTTL,E.P ne’e la’o loos ka la’e,”  Sekretáriu Estadu Komunikasaun Sosiál (SEKOM), Expedito Dias Ximenes hateten bá Hatutan.com iha Palásiu Governu, Segunda (21/08/23).

Lee Mós: SEKOMS Sei Forma Ekipa Inspesaun bá Projetu Torre RTTL,E.P Gasta Millaun $1.4

Projetu harii torre-tolu (3) ho uma-rua (2) bá kada torre ne’e sei gasta Orsamentu Estadu millaun $1.4, ne’ebé Ministériu Assuntu Parlamentár no Komunikasaun Sosiál (MAPKOMS) iha VIII Governu Konstitusionál mak hanesan implementadór.

Konkursu Públiku bá projetu harii torre-tolu (3) ne’e halo iha Komisaun Nasionál Aprovizionamentu (CNA, sigla portugés) no MAPKOMS simu rezultadu hodi ikus-mai assina kontratu servisu ho empreza vensedór Global Citra Tama hosi Indonézia.

Kostrusaun edifísiu foun RTTL,E.P rasik, Empreza BANIR LEMA UNIP.LDA assina kontratu ho Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, iha loron 29 fulan-Juñu 2022 no projetu ida-neʼe ho montante orsamentu $1,196,095.54.

Tuir planu, iha Tersa 22 Agostu tinan ne’e, IX Governu Konstitusional hahú aprezenta Proposta Orsamentu Retifikativu (OR) tinan 2023 bá Parlamentu Nasionál (PN) hodi halo diskusaun no aprovasaun.

Lee Mós: SEKOMS ho Ekipa Tékniku Sei Haree Fali Projetu Harii Torre Tolu ho Konstrusaun Edifísiu RTTL,E.P

Jornalista: Vito Salvadór