Papa Francisco Hakotu Iis, Timor-Leste Tama Períodu Lutu Nasionál Semana Ida

Hatutan.com, (21 Abríl 2025), Díli- Papa Francisco hakotu nia iis iha kaza Santa Marta Vatikanu, Segunda (21/04/2025), ho idade 88. Ho Papa nia mate ne’e, Governu Timor-Leste mós deside ona hodi tama ba períodu lutu durante semana ida.

Lee Mós: Mensajen Papa Francisco Ba Kuarezma 2025: “Mai Ita La’o Hamutuk iha Esperansa”

Sarani sira entuzizmu simu Papa Francisco iha Díli, 09 Setembru 2024. Foto/Dok.Tome da Silva

Ministru Administrasaun Estatál (MAE) Tomas do Rosario Cabral mós fó sai ona avizu ba entidade Governu hotu, hahú husi nasionál to’o suku sira iha territóriu nasionál atu hasae bandeira mea-aste durante semana ida, hahú hosi loron Tersa-Tersa (22-28/04/2025). 

“Iha tuku 7:35 dadeer ne’e, Bispu Roma nian, Papa Francisco, fila ba Aman Maromak Nia Kadunan Santu. Papa Francisco nia moris tomak dedika ona ba Na’i Nia servisu no Ninia Kreda. Nia hanorin ita atu moris iha valór sira Evanjellu nian ho fidelidade, aten-brani no domin universál, liuliu iha favór ba sira ne’ebé kiak liu no marjinalizadu liu. Ho gratidaun imensu ba ninia ezemplu nu’udar Na’i Jesus nia dixípulu loloos, harohan atu Papa Francisco nia klamar hetan Maromak Trindade Nia domin mizerikórdia rohan-laek.” Hatutan.com sita Vatikanu News, Segunda (21/04/2025)

Iha períodu Papa Francisco nia pontifikadu iha tinan 12 nian marka ho ninia popularidade entre sarani sira no ho rezisténsia maka’as iha Katolisizmu nia laran ba ninia projetu reforma nian, maski sira-ne’e la kestiona pilar doutrina sira.

Papa Francisco nia saúde halo ema hotu iha mundu preokupa, to’o hamosu espekulasaun kona-ba posibilidade demisaun ida – hanesan ho nia antesesór, Bento XVI, halo.

Iha Domingu Páskua, 20 fulan-Abríl 2025, loron ne’ebé Igreja Katólika selebra Kristu Nia moris-hi’as, Papa Francisco halo apresiasaun fiar nian no deklara “Iha maravilla fiar Páskua nian, lori iha ami-nia fuan espetativa hotu dame no libertasaun nian, ami bele dehan: Ho Ita, Na’i, buat hotu hahú fali ho Ita”.

Dezde inísiu fulan-Fevereiru, Amu-Papa sofre bronkite no to’o tenke interrompe leitura diskursu nian durante nia audiénsia jerál semanál tanba susar atu dada iis.

Igreja lokál iha Timor-Leste konfirma Papa Francisco nia falesimentu

Arsebispu Arkidioseze Metropolitana Díli, Dom Virgílio Kardeál do Carmo da Silva, SDB hateten simu direita informasaun husi Vatikanu kona-ba falesimentu Papa Francisco nian.

“Hakarak atu konfirma ba povu Timor tomak, liu-liu sarani doben sira hotu kona-ba sua Santidade Papa Francisco nia mate foin ita rona. Simu direita telefone ida husi Vatikanu mai husi monseñór Marco Sprizzi hodi fó hatene mate katak papa Francisco nia is kotu tuir oras Itália nian 7:35 no Timor-Leste nian karik 15:35,” Arsebispu Arkidioseze Metropolitana Díli, Dom Virgílio Kardeál do Carmo da Silva, SDB hateten liu husi konferénsia ba Imprensa iha Câmara de Eclesiástica Lecidere, Segunda kalan.

Kardeál hatutan ho notísia falesimentu ida ne’e halo ema hotu laran todan, laran triste tamba foin mak iha fulan hirak liu ba povu Timor-Leste sente Papa Francisco nia prezensa iha ne’e.

Lider Igreja lokál Timor-Leste ne’e mós subliña mensajen importante no liu-liu liafuan ikus Papa Francisco nian bainhira husik hela Timor-Leste mak “Ha’u nia fuan ne’e, ha’u nia domin ne’e iha hela Timor”.

Kardeál mos husu ba Bispu sira no padre pároku sira iha Parókia ida-idak atu prezide misa requem ida ba Papa Francisco nia falesimentu no hodi hein informasaun ofisial husi Vatikanu ba iha serimónia funerál nian no misa.

Timor-Leste iha sentidu profanu ba Papa Francisco nia falesimentu

Prezidente Repúblika (PR), José Ramos-Horta, hodi estafu Timor-Leste nia naran hatoo sentidu kondolénsia kle’an ba  Papa Francisco falesimentu.

“Ha’u simu informasaun ofisial katak Papa Fransisco termina ona nia jornada moris iha minutu ruma liu ba. Ita Katólika no mos la’ós Katólika de’it maibé relijiaun hotu-hotu umanidade tomak lakon ita nia Amu Papa Fransisco ne’ebé iha impaktu kle’an no influénsia bo’t iha iistória mundu.” hateten Prezidente Repúblika (PR), José Ramos-Horta, liu husi vídeo badak ne’ebé Hatutan.com asesu husi media Palásiu Prezidensiál husi Sidade Sofia Bulgaria, Segunda (21/04/2025).

Xefe estadu mos husu ba sarani Timor-Leste atu hanoin iha orasaun ho domin Papa Fransisco nia vizita mai Timor-Leste, iha fulan Setembru tinan 2024.

Timor-Leste tenke lutu nasionál

Prezidente Repúblika (PR), José Ramos-Horta, mos husu ba governu Timor-Leste atu dekreta lutu semana ida ba Lider igreja Katolika, Papa Francisco.

“Ha’u husu ba governu Timor-Leste no mos ba povo doben Timor-Leste, atu lutu semana ida ba ita nia lider Mundiál Papa Francisco ne’ebé hakotu nia jornada moris iha Roma.” Hateten Prezidente Repúblika José Ramos-Horta.

Xefe Estadu husu governu no povu Timor-Leste atu lutu semana ida no dada Bandeira nu’udar sentidu kondolénsia profunda ba Lider Mundiál Papa Francisco ne’ebé hakotu ona nia jornada moris iha Roma.

Jornalista Estajiaria: Zita Menezes