Kuaze Fulan-Lima Halo Manutensaun ho Orsamentu US$786.000, Agora Berlin Nakroma “Avaria” Fali

Hatutan.com, (12 Juñu 2025) Díli–Loron rua liubá, Ró Berlin Nakroma avaria fali mezmu ró refere halo tiha ona manutensaun ne’ebé han tempu kuaze fulan-lima nia laran no foin fila mai Timor-Leste iha loron 11 fulan-Marsu 2025.

Lee Mós: Kustu Manutensaun Ró Belin Nakroma Hamosu Duvida, MTK Hein Hela Relatóriu

Ró Berlin Nakroma atraka fali iha Portu Díli hafoin besik fulan-haat halo manutensaun iha Surabaya-Indonézia. Foto/Dok

Ró Berlin Nakroma halo manutensaun iha PT Dewa Ruci Agung, Surabaya-Indonézia ho orsamentu US$786.000. Manutensaun ne’e han tempu kuaze fulan-lima liu hahú husi fulan-Outubru 2025 no foin fila iha loron 11 fulan-Marsu 2025.

Informasaun tékniku  ne’ebé Hatutan.com halibur husi fontes oioin hateten Berlin Nakroma avaria fali tanba kondisaun mákina manas no suar maka’ás no ekipamentu navegasaun nian hanesan Radar, kompas mós la operasionál, Life boatkau sekoci salva vida mós la di’ak.

Ba kestaun ne’e, Hatutan.com, Kinta (12/06/2025), halo konfirmasaun ho Prezidente  Administrasaun   Porto Timor-Leste Institutu Públiku (APORTIL, I.P.), José de Oliveira Leão, klarifika   kondisaun ró Berlin Nakroma la’ós problema boot, akontese problema ki’ik iha sistema  elétriku nian hodi halo ró ne’e avaria iha loron 10 fulan-Juñu ne’e.

Prezidente APORTIL, I.P, José de Oliveira Leão.

José de Oliveira Leão adianta informasaun katak Sesta  (13/06/2025), kompañia tékniku sira husi Kompañia Dewa Ruci Agung to’o  iha Díli   hodi rezolve hikas  fallansu tékniku Ró Berlin Nakroma nian.

“Ita sei iha garansia ho sira (Kompañia Dewa Ruci Agung),  Sesta aban,  tékniku sira husi Kompañia Dewa Ruci Agung-Indonézia mai  hodi tau fali foun, maibé agora daudaun ami rezolve ona no ami prepara ona situasaun  hodi responde ró ne’e aban sei la’o nafatin, tékniku sira husi kompañia ne’ebé maka halo manutensaun to’o mai rezolve fila-fali ró ne’e,” Prezidente APORTIL, I.P, José de Oliveira Leão hateten.

Nia hatutan, ró ne’e laiha problema, enkuantu ida semana kotuk ne’e  problema iha bateria de’it, maibé bateria foun ne’e  tau hotu tiha ona.  Agora  nia module software ne’e maka mate,  tanba tékniku sira maka regula ka steel.

“Agora daudaun  ami rezolve  hela atu aban ró ne’e halai normál fila-fali. Tanba ne’e, ha’u husu bá komunidade Ataúru atu aguenta uitoan,  ami agora rezolve hela aban bele halo atividade  bá-mai Ataúru ho Berlin Nakroma,” José Leão hateten.

Jornalista: Marcelino Tomae