Hatutan.com, (12 Marsu 2025), Díli—Kustu manutensaun Ró Berlin Nakroma hamosu duvida tanba iha governu anteriór aloka kustu manutensaun ba ró refere ba estaleiru ka docking  hanesan iha Surabaya-Indonézia kustu $200,000. Mas iha Governu atuál ne’e kustu manutensaun sa’e tiha ba $785,000.

Lee Mós: Bankada PLP Preokupa ho Kustu Manutensaun Ró Berlin Nakroma $785,000

Ró Berlin Nakroma atraka fali iha Portu Díli hafoin besik fulan-haat halo manutensaun iha Surabaya-Indonézia. Foto/Tome da Silva

Iha sesaun plenária  Parlamentu Nasionál, Tersa (11/03/2025), Xefe Bankada PLP, Maria Angelina Sarmento, kestiona kustu manutensaun Ró Berlin Nakroma $785,000.Nia hateten iha Governu anteriór kustu manutensaun ba Ró Berlin Nakroma $200,000, maibé iha Governu ida-ne’e iha diferénsia to’o kedas $785,000.

 Bá preokupasaun ne’e, Hatutan.com halo konfirmasaun direta ho Prezidente Autoridade Portuáriu Timor-Leste, Institutu Públiku (APORTIL, I.P), José de Oliveira Leong, maibé seidauk disponivel atu fó klarifikasaun.

“Nu’udar Prezidente APORTIL, I.P atu ko’alia ba média idak-idak labele tanba orasida média nafatin  mai tan de’it, tanba ne’e, labele maibé kona-bá servisu buat hotu-hotu konsege la’o teknikamente sei esplika duni ba públiku hodi hatene,” José de Oliveira Leong, Kuarta (12/03/2025).

José Leong dehan agora nia labele ko’alia ba Hatutan.com ka ko’alia ba média idak-idak, maibé Sesta (14/03/2025), Primeiru-Ministru Xanana Gusmão koko tiha lai halo operasaun ho  Ró Berlin Nakroma ba Ataúro mak bele ko’alia.

“Kona-bá manutensaun foin daudauk, ba sasán sira ne’ebé mak troka rai hotu iha ró laran, karik ita boot sira mós ba  haree sasán sira ne’e. Ha’u labele ko’alia no Sesta to’o Ataúro mak ha’u ko’alia dala-ida ba públiku liu hosi média hotu-hotu,” Prezidente APORTIL, I.P, José de Oliveira Leong hateten ba Hatutan.com iha edifísiu APORTIL, Dili.

Prezidente APORTIL hateten membru deputadu sira iha Parlamentu Nasional inklui mós públiku kestiona kona-bá montante kustu manutensaun ne’e loos, maibé sira iha Parlamentu ko’alia polítika tanba ne’e nu’udar prezidente APORTIL se ko’alia téknika atu esplika detallu kestaun sira ne’e hotu atu nune’e públiku bele hatene hodi labele duvida.

Nia hateten manutensaun Ró Berlin Nakroma uluk ho agora nia diferensa mak ne’e uluk sira uza kompañia rua, maibé agora ne’e uza kompañia ida de’it  tanba ne’e teknikamente sei ko’alia iha  Sesta mai ne’e.

MTK Hein Hela Relatóriu

Ministru Transporte no Komunikasaun (MTK), Miguel Marques Gonçalves Manetelu, ne’ebé Hatutan.com konfirma iha Palásiu Governu,  hateten nia parte  hein hela relatóriu hosi APORTIL, I.P ho Diresaun Nasionál Transporte Maritima (DNTM) kona-bá manutensaun Ró Berlin Nakroma kuaze fulan haat iha Surabaya-Indonézia.

Ministru Miguel Manetelu hateten APORTIL, I.P  nia natureza autonomia finanseiru no patrimóniu rasik ho nune’e desizaun hotu kona-bá konkursu públiku manutensaun Ró Berlin Nakroma nian pertense ba kompeténsia APORTIL,i.P nian.

“Agora ha’u hein hela relatóriu hosi sira no sira aprezenta relatóriu mas dokumentu seidauk kompletu, la’ós de’it hosi APORTIL maibé mós hosi DNTM hanesan autoridade reguladór ida sira mak halo fiskalizasaun ba prosesu manutensaun,” Miguel Manetelu hateten.

Nia husu ba parte kompetente sira iha APORTIL,I.P ho DNTM  atu bele fó informasaun ba jornalista sira no labele dehan ba husu fali ministru tanba kona-bá manutensaun Ró Berlin Nakroma nian ne’e se nafatin husu relatóriu.

“Relatoriu ne’e APORTIL haruka ona mas ha’u haruka ha’u nia xefe gabinete kontinua kontaktu hodi husu tan informasaun balun. Ha’u. hatene públiku kestiona tanbasá ha’u hatene,” Miguel Manetelu dehan.

Ministru Miguel Manetelu hein hela relatoriu ne’e mai tiha no haree halo didi’ak depois mak bele ko’alia tanba ida ne’e la’ós hosi APORTIL mesak, maibé ho DNTM hotu tanba bainhira akontese buat ruma iha manutensaun ba ró ne’e rasik DNTM mak halo fiskalizasaun.

 Jornalista Estajiáriu : Lazaro Pereira Quefi