Dili
Jornalista Hatutan.com Hetan Bandu Foti Imajen no Video iha Fatin Projetu Edifísiu Sentrál RTTL,EP, SEKOMS: Governu Hein Simu De’it
Hatutan.com, (05 Jullu 2025), Díli—Kompañia kontraktor husi Indonézia, PT Aulia Multi Sarana, kontinua bandu jornalista Hatutan.com atu foti imajen no video iha fatin projetu konstrusaun edifísiu sentrál Rádiu Televizaun Timor-Leste, Empreza Públiku (RTTL,E.P).
Lee Mós: Projetu Edifísiu Sentrál RTTL,E.P, PT Aulia Multi Sarana Garante Termina Tuir Tempu Kontratu
Dezeñu Edifisiu foun RTTL,E.P. Foto/Repro.Espesiál
Projetu edifísiu sentrál foun RTTL,E.P ne’e previstu investimentu ida ho montante US$5,970659,11, ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés) hanesan implementadór.
Projetu ne’e hahú ona nia lansamentu hatuur fatuk-inan husi Primeiru-Ministru (PM) Kay Rala Xanana Gusmão, iha loron 19 fulan-Dezembru tinan 2024 no tuir kontratu tenke finaliza projetu ne’e iha fulan-Marsu 2026
Iha entrevista ida ho Hatutan.com, Segunda, 23 Juñu 2025, iha Palásiu Governu, Sekretáriu Estadu Komunikasaun Sosiál (SEKOMS) Expedito Dias Ximenes, rekoñese projetu konstusaun ne’e la’o tarde, tanba kompñia PT Aulia Multi Sarana husi Indonézia laiha kapasidade hodi rezolve servisu ne’ebé sai problemetiku iha área ka resintu RTTL,E.P iha Caicoli, Dili.
“Konstrusaun ne’e la’o tarde tanba sira dehan empreza ne’e ke’e bee iha kraik, konserteza empreza ne’e tenke hein tan fulan-tolu atu bele halakon tiha bee iha kraik atu hametin nia fondasi ne’e tenke metin makaas liu, ne’ebé tenke metin atu aban-bainrua sira halo andar haat ne’e,” SEKOMS Expedito Dias Ximenes argumenta.
Nota Editoriál nian, iha Sesta, 27 fulan-Juñu 2025, jornalista Hatutan.com ba halo kobertura iha terrenu projetu konstrusaun edifísiu sentrál RTTL,E.P ne’ebé ho nia kustu projetu US$3,760,405.00, maibé tékniku sira husi PT Aulia Multi Sarana, kompostu husi Timor-oan balun ho sidadaun sira nasionalidade Indonéziu nian ho “hirus” impede atividade Jornalístiku iha lokál obra tanba konsidera notísia Hantutan.com nian iha edisaun, Segunda 23 fulan-Juñu tinan 2025, ho títulu “Projetu Konstrusaun Edifísiu Sentrál RTTL,E.P ho Kustu $3,760,405.00 Atraza” lee link…( https://www.hatutan.com/2025/06/23/projetu-konstrus…760405-00-atraza/ ) ho notísia edisaun, Tersa 24 fulan-Juñu tinan 2025 ho títulu “Projetu Demolisaun Bá Edifísiu Sentral RTTL,E.P ho Montante US$179,066.90 Hamosu Duvida” lee link…( https://www.hatutan.com/2025/06/24/projetu-demolisa…90-hamosu-duvida/ ) rezulta tékniku sira rona-lia ka hetan xamada husi parte dirijente RTTL,E.P ho dirijente sira iha Programa Nasoins Unidas ba Dezenvolvimentu (UNDP, sigla inglés).
Tékniku sira lia-tun ba jornalista Hatutan.com, katak hahú hosi ohin ba oin, atu hetan informasaun hosi PT Aulia Multi Sarana, tenke liu-hosi RTTL,E.P ho UNDP hodi hetan autorizasaun, no prosesu atu entrvista ne’e tenke submete karta pedidu formal.
“Secara legál ne’e tenke liu-hosi karta formal ruma, la bele ita-boot sira tama mai derepente de’it, ne’e ladún di’ak, tanba ami nia kritéria ka rekizitu hosi kompañia maka hanesan ne’e, katak tenke iha mós karta formal ida, ita-boot sira fó tiha karta mai depois ami determina loron maka ita-boot sira mai entrevista,” tékniku ida lia-tun dehan ho hirus.
Prezidente Konsellu Administrasaun RTTL,E.P, Eliziu Isaac Fernandes, ne’ebé Hatutan.com konfirma iha Otél Timor, Kuarta (02/07/2025), informa konstrusaun edifísiu RTTL,E.P la’o hela no daudaun sei iha hela faze teste rai iha laboratóriu.
Nia dehan prosesu bá konstrusaun ne’e hein hela rezultadu hosi teste laboratóriu, bainhira rezultadu sai ona, kompañia PT Aulia Multi Serana komesa fali servisu ba harii fundasaun nian.
Prezidente Konsellu Administrasaun RTTL,EP ne’e énfaze tan, katak jornalista Hatutan.com bele ba halo konfirmasaun ho PT Aulia Multi Sarana iha terrenu projetu konstrusaun edifísiu sentrál RTTL,E.P nian atu bele iha balansu no hetan esplikasaun detallu liu kona-ba servisu tékniku nian.
“Ita-boot sira jornalista hakarak bá entrevisra kompañia, ne’e avontade, karik ita-boot sira atu bá konfirma haree sira nia deretór, maka imi bele konfirma bá, maibé hanesan badaen ka tékniku sira, dala ruma sira ladún komprende, ita-boot sira bele ko’alia ho konsultan, no sira hosi UNDP, maibé diretór kompañia dala ruma viajen bá mai bá Indonézia entaun ita-boot sira atu presiza tenke halo uluk audénsia,” Prezidente RTTL,E,.P, Elizeu Isaac Fernande fó suzestaun.
Baze ba sujestaun Prezidente RTTL,E.P, Elizeu Isaac Fernandes nian ne’e, maka iha loron Kinta, 03 fulan-Jullu ne’e, heleu tuku 10:30 Otl, Hatutan.com, ba iha lokál projetu konstrusaun ho intensaun atu marka audiénsia no halo entrevista ho parte kompetente husi kompañia kontraktor PT Aulia Multi Sarana, maibé tékniku hosi kompañia husi Indonézia ne’e la autoriza jornalista asesu tama no bandu mós jornalista foti imajen ka video.
“Heiiii, ita-boot la bele hasai imajen ka hasai video. Ami maka dehan katak sidauk bele, tanba asuntu ne’e importante bá ami, ne’ebé di’ak liu ita sai lalais hosi fatin ne’e, tanba ami iha ne’e laiha informasaun. Sé ita-boot sira hakarak halo kobertura bá iha UNDP de’it,” tékniku sira hosi kompañia PT Aulia Multi Sarana hateten ba jornalista Hatutan.com.
Hatutan.com transmite mós informasaun balun relasiona ho sujestaun Prezidente RTTL,E.P nian katak atu notísia ne’e balansu liu presiza konfirma mós ho PT Aulia Multi Sarana, maibé tékniku sira saran-lia dehan, “sé ita boot hetan tiha rekomendasaun hosi RTTL,EP, ami presiza karta formal, tanba ita-boot sira mai de’it hanesan ne’e, ami sei laiha imformasaun, ne’e la’ós ami mka lakohi ko’alia ka fó informasaun, maibé ami nia regra maka hanesan ne’e,”.
Governu Hein Simu De’it Rejultadu
Sekretáreiu Estadu Komunikasaun Sosiál (SEKOMS), Expedito Dias Ximenes, ne’ebé Hatutan.com, konfirma fila-fali iha Sesta (04/07/2025), lia-tun dehan, prosesu hotu kona-bá konstrusaun edifísiu Sentrál RTTL,EP ne’e Governu la hatene, tanba ne’e UNDP ho Governu Japaun nian.
“Ne’e husu UNDP ho Japaun maka hatene, husu bá sira, la’ós mai husu fali ha’u, ha’u maka hatene fali ida-ne’e ka? tanba Governu hein de’it atu simu edifisiu ne’e. Jestaun tomak hosi UNDP,” SECOMS Expedito Loro Dias Ximenes, hateten iha resintu Universidade Nasionál Timor-Lorosa’e (UNTL).
Kona-bá item projetu demolisaun bá edefísiu Sentrál RTTL,EP ho montante $179,066,90, tuir Expedito Dias, katak kona-bá osan ne’e nia laiha koñesimentu hosi parte UNDP maka hatene halo jestaun no bá iha prosesu konstrusaun ne’e.
Hatutan.com husu SEKOMS atu esplika difikuldade terrenu konstrusaun tanba dehan iha bee-matan no presiza halo tan teste ba rai iha laboratóriu, SEKOMS Expedito Dias Ximenes rejeita fó komentáriu.
Komparasaun difikuldade terrenu ba konstrusaun edifísiu sentrál foun RTTL,E.P nian kuaze hanesan mós ho projetu edifísiu multi-funsaun RTTL,E.P nian ho medida andár tolu ne’ebé tinan uluk ezekuta husi empreza nasionál Banerlema tanba terrenu obra ne’e iha rai okos iha bee-matan, maibé progresu projetu edifísiu multi-funsaun RTTL,E.P nian finaliza ho di’ak no daudaun ne’e utiliza ona.
Hosi sorin seluk Hatutan.com mós halo esforsu atu halo konfirmasaun no audiénsia ho parte UNDP liuhosi númeru telefónika ne’ebé konsta iha karta kontratu servisu UNDP ho PT Aulia Multi Sarana, maibé seidauk atende no seidauk simu telefónika.
Jornalista: Marcelino Tomae