Komisaun Rekrutamentu PNTL Simu Dokumentu Kandidatu Sira 4.428

Hatutan.com, (26 Agostu 2025), Díli-Komisaun Rekrutamentu kadete Polísia Nasional Timor-Leste (PNTL) 2025 provizoriamente  simu dokumentu husi sira ne’ebé submete fali ona husi pontu vokal sira  husiu munisípiu sira hotu  hamutuk dokumentu 4.428.

Lee Mós: Lamentasaun PDHJ-HABADA Kona-bá Kuota 20% Rekrutamentu PNTL, Ministru Interiór Afirma Tenke Tau Kondisaun Espesífiku

Komisaun Rekrutamentu PNTL 2025. Foto/inal Cabral dos Santos

Portavós Komisaun Rekrutamentu PNTL 2025, Superintendente Polísia António da Luz, informa total kandidatu sira ne’ebé  simu formuláriu no mós kadete foun ne’ebé mak submete ona dokumentu ba pontu fokal munisípiu ida-idak nian na’in-4.428.

Kandidatu sira ne’ebé mak simu formuláriu hahú husi  loron 05-25 fulan- Agostu 2025 hamutuk 17.148, sira ne’ebé mak liu ona iha admisaun katak sira ne’ebé aptu, sira ne’ebé mak la liu ka la aptu sira nia idade liu no mós altura la to’o hamutuk 4.702.

Ba jornalista sira iha Akademia PNTL, Comoro, Díli, Tersa (26/08/2025), Superintendente Polísia António da Luz, informa kandidatu sira ne’ebé submete fali ona dokumentu ba pontu fokal iha ida-idak nia munisipiu total 4.428 ne’e fahe ba kategória tolu, mak hanesan kategória jerál hamutuk  3.037, jerasaun patriota 835 ho kategória Polísia nia oan na’in-556.

“Aproveita  oportunidade ne’e atu fó hatene ba kandidatu sira depois submete dokumentu to’o iha loron 09 fulan-Setembru 2025 no iha loron 10 fulan-Setembru 2025 husi pontu fokal munisípiu sira sei lori dokumentu sira mai entrega  iha sekretriadu atu halo verifikasaun ba dokumentu sira ne’e molok taka sai naran sira se mak aptu iha selesaun dokumentu hodi prepara ba prova eskrita,” nia hateten.

Komisaun rekrutamentu PNTL 2025 husu ba kandidatu sira prepara regua, lapis 2B, apagador, afiador hodi partisipasaun iha ezame eskrita tuir mai.

Jornalista: Juvinal Cabral dos Santos