Hatutan.com, (14 Agostu 2025), Díli-Ministru Interiór (MI), Francisco da Costa Guterres, hateten instituisaun PNTL la’ós hanesan funsionáriu baibain tanba ne’e tenke iha kondisaun espesífiku iha prosesu rekrutamentu nian.

Lee Mós: PDHJ ho HABADA Kestiona Kuota 20% iha Rekrutamentu PNTL

Ministru Interiór, Francisco da Costa Guterres. Foto/Juvinal Cabral dos Santos

Hatán ba lamentasaun Provedór Direitu Umanu no Justisa (PDHJ)  ho organizasaun sosiedade sivíl Hali Ba Dame (HABADA) ne’ebé konsidera kuota 20% rekrutamentu Nasionál Timor-Leste (PNTL) 2025 iha tendénsia diskriminativu no la reflete prinsípiu Konstituisaun RDTL, Francisco Guterres hateten, sira-nia parte hein de’it prosesu sira ne’ebé PDHJ ho HABADA   levanta, importante mak Governu kria kuota 20% ba veteranu nia oan, 20% ba polísia nia oan, 20% ba feto no 40% ba públiku, tanba  instituisaun PNTL ne’e instituisaun espesífiku la’ós instituisaun normal ka hanesan funsionáriu baibain.

“Sé ita hotu hakarak dehan katak PNTL tenke disiplina, PNTL tenke professional ne’e tenke iha mós kondisaun espesífiku tau ba iha ne’ebá ka agora o hanoin foti professional ne’e foti hanesan baibain ba de’it ka ne’e la iha,” Ministériu Interiór, Francisco da Costa Guterres ba jornalista sira, Kinta (14/08/2025).

Tuir Ministériu Interiór atu hakarak PNTL professional tenke iha kondisaun espesífiku ne’ebé iha tau para hodi bele forma sai professional. Alinde ne’e, Ministériu Interiór mós tau fiar tomak ba komisaun rekrutamentu PNTL kona-ba sukat kadete foun sira ne’ebé públiku kestiona  uza de’it metru sosa iha loza Xina sira-nian, maibé   Ministru Interiór tau konfiansa ba Polísia sira sei la mosu irregularidade.

“Ha’u fiar Polísia sira, agora ne’e mak ita foin lori fali teknolojia ne’e, uluk liu ne’e ita lori ai sukat malu mós di’ak hela, halo oinsá mak agora labele,” Francisco da Costa Guterres hateten.

Ministériu Interiór husu mós ba jornalista sira atu promove Timoroan sira no fó konfiansa ba komisaun rekrutamentu, labele garantia no lori estranjeiru nia ekipamentu de’it.

Jornalista: Juvinal Cabral dos Santos