Prosesu Sosa Karreta Ba Deputadu 65 iha Faze Finál iha CNA

Hatutan.com, (03 Setembru), Díli— Ministériu Planeamentu no Investimentu Estrátejiku (MPIE) liuhosi Komisaun Nasionál Aprovizionamentu (CNA, sigla portugés) finaliza ona prosesu administrativu konkursu públiku sosa karreta ba membru Parlamentu Nasionál na’in-65.

Lee Mós: Kona-bá PN Sosa Karreta Foun, CNRT Respeita Liberdade Espresaun no Kritíka Sosiedade Sivíl

Edifisiu CNA. Foto/Dok.Hatutan.com

Ministru MPIE, Gastão de Sousa  hateten prosesu  finál tiha ona, maibé tanba iha reklamasaun ka protest, maka CNA   sei halo post kualifikasaun bá diler husi  kompañia sira ne’ebé envolve iha konkursu  kualidade ka lae.

“Ha’u dehan tiha ona bá CNA atu bá halo post  kualifikasaun,  bá kompañia sira fa’an karreta (dealer) ne’ebé maka hatama ita haree, sira-nia kompañia fa’an karreta ne’e maka’ás duni ka lae. Agora ha’u hein relatóriu CNA  ha’u sei hato’o relatóriu bá Primeiru Ministru,  tanba  ne’e ha’u hein relatóriu kuandu loos ona, semana  ida rua asina kontratu karreta bele tama, kompañia ne’e sira ne’e husi Timor-oan,” Ministru Gastão de Sousa  hateten bá jornalista sira hafoin remata reuniaun Konsellu Ministru iha Palásiu Governu, Kuarta (03/09/2025).

Kona-bá kritika husi  Estudante Univesitáriu sira no sosiedade sivíl sira atu la bele sosa karreta ba deputadu na’in-65 tanba povu sei moris susar tebetebes,  Ministru Gastão de Sousa, informa  halo prosesu  aprovizionamentu de’it, tanba  Parlamentu ne’e  orsamentu ketak,   órgaun soberania ketak, atu kansela depende bá projetu nain, tanba  prosesu  konkursu,  tama tuir lei $1 milliaun bá leten  tenke    tama liu-husi Komisaun Naisionál Aprovizionamentu (CNA).

“Tanba ne’e agora ha’u  hein de’it relatóriu CNA,  para ha’u bele hato’o bá Primeiru-Ministru. atu kansela ka lae,”  Gastão de sousa  tenik.

Tuir nia katak  kuaze kompañia  Timor-oan maka   kompete iha konkursu sosa karreta bá  Parlamentu Nasionál.  “Ha’u  la ladún  lembra  kompñia  hirak maka kompete iha konkursu ne’e , maibé kuaze liu 10,”  Ministru Gastão de Sousa hateten.

Jornalista:Marcelino Tomae