PNTL Detein Suspeitu Nain-rua ho Vitíma Nain-sia Husi Bangladesh Tenta Ultrapasa Ilegál

Hatutan.com, (01 Outubru 2025), Díli– Polísia Nasionál Timor-Leste (PNTL) Munisípiu Liquiça, Tersa (30/09/2025), detein suspeitu nain-rua (2) ho vitíma nain-sia (9) husi Banglades,  tenta halo ultrapasa ilegal iha Batugadé atu ba Austrália.

Portavós PNTL Superintendente Polísia Joăo Belo dos Reis. Foto/dok

“PNTL deteta kazu ne’e hola parte iha tráfiku umanu, ne’ebé prosesu lao hela suspeitu identifika nain-rua  inklui vitíma sidadaun Bangladesh nain-sia agora iha hela prosesu investigasaun nia laran,” portavós PNTL Superintendente Polísia João Belo dos Reis,  ba jornalista sira hafoin remata enkontru Forsa Tarefa  Konjunta iha Kuartel Jerál PNTL, Caicoli, Kuarta, (01/10/2025).

Tuir dokumentu ne’ebé PNTL asesu katak sira-nia planu komunikasaun ne’e sira hakarak ba Austrália ilegál, liuhusi teritoriu Timor-Leste tama fali ba Kupang atu liu ba Austrália.

“Ai-moruk ne’ebé sira lori ne’e ita sei halo ezaminasaun, se ai-moruk sira ne’e konsidera droga ka ai-moruk ba saúde nian, ne’e ita sei halo ezaminasaun rezultadu hotu mak ha’u ko’alia ba maluk sira, koordenasaun ne’e ho Ministeriu Saúde (MS), Migrasaun no autoridade seluk ne’ebé hatene kona-bá kazu ne’e,” Superintendente Polísia João Belo dos Reis informa.

Suspeitu nain-rua inklui vitíma nai-sia ne’e mai husi  Bangladesh mesak mane de’it ho aviaun no ho dokumentu legál tama mai Timor-Leste, depois tenta atu tama Indonézia hodi kontinua ba Austrália ho illegal, mas la konsegue, dadaun  sidadaun sira ne’e asegura hela iha Diresaun Servisu Investigasaun Kriminal (DSIK).

Jornalista: Juvinal Cabral dos Santos