MI Hatun Ona Despaixu Ba Komandu Jerál PNTL Halo Investigasaun Ba Superintendente Asistente Polísia AQ

Hatutan.com, (13 Novembru 2025), Díli-Ministru Interiór, Francisco da Costa Guterres, hatun ona despaixu ba Komandu Jerál  Polísia Nasional Timor-Leste (PNTL)  atu halo investigasaun ba Superintendente Asistente Polísia AQ ne’ebé deskonfia falsifika  dokumentu veteran   hodi  hetan grau 8 a 14.

Lee Mós: Membru PNTL Ida Suspeita Falsifika Dokumentu Veteranu

Ministru Interiór, Francisco da Costa Guterres. Foto/Juvinal Cabral dos Santos

Ministru Interiór (MI) Francisco da Costa Guterres ba jornalista sira iha resintu Parlamentu Nasional (PN), Kinta(13/11/2025), hateten,  despaixu ne’e husu mós atu Komandu Jerál PNTL akompaña prosesu ne’e to’o tribunal hodi hetan deizaun ida loos no justu.

“Tribunál  deside katak nia sala,  medida forte ba nia tanba ne’e asuntu ida asuntu importante tebe-tebes. Sira fasifika dokumentu veteran ne’e tenke hare, bele to’o iha sansaun ida todan liu ne’ebé agora tenke hein Tribunál,” Ministru Francisco da Costa Guterres hateten.

Nia argumenta katak medida sei foti kuandu Tribunál deside ona, medida sei forte hasoru ema ne’e, medida forte ne’e hatene ona katak buat barak mak sei foti sei hein Tribunál mak foti desizaun.

Ministru Interior informa, agora seidauk ko’alia membru hira mak komete flasifikasaun dokumentu veteran, maibé to’o rezultadu mak dehan ema nain hira.

Fó hanoin fali katak, prosesu deskonfia membru PNTL ida suspeita fasifikasaun dokumentu veteranus iha Munisipiu Lautem  la’o ona no foti vitima nia deklarasaun no sasin, depois mak  sei  bolu  suspeitu sira ne’ebé plasifika dokumentus veteranus to’o hetan grau 8 a 14.

Iha sorin seluk Portavós interino seguransa Ministériu Interior (MI) Superintendente Asistente Polísia Mouzinho T. Correia, ba jornalista iha sala konferensia MI, Villa Verde, hateten, Diresaun Investigasaun Kriminál (DSIK)  rekolla ona informasaun husi testemuña nain-rua prosesu ne’e la’o bazeia ba keixa mai husi testemuña nain rua.

“To’o agora Diresaun Servisu Investigasaun Kriminál (DSIK) seidauk rona kona-bá ema nain rua ne’e seidauk iha, so iha keixa ida ema ida de’it membru Polísia Nasional Timor-Leste (PNTL) ne’ebé  deskonfia halo falsifikasaun dokumentu veteranus nian,” Portavós PNTL  Mouzinho haktuir.

Karta husi Ministériu Interior ne’e sei iha Komandu Jerál Polísia Nasional Timor-Leste (PNTL) nia fatin seidauk to’o, maibé prosesu ne’e la’o bazeia ba keixa mai husi testemuña nain rua, mai husi ema keixa nain rua.

Jornalista: Juvinal Cabral dos Santos