Ministru Interíor Husu PNTL Foti Medida Forte Ba Autór Sira Sona Membru CSP

Hatutan.com, (20 Novembru 2025), Díli- Ministru Interiór,  Francisco da Costa Guterres, husu Polísia Nasionál Timor-Leste (PNTL) tenke foti medida forte bá autór sira ne’ebé sona kanek membru husi Korpu Seguransa Pesoal (CSP siglá portugés) Ajente Prinsipál José Lino Arcanjo Tomae iha parte kakorok, liman loos nian, iha Vila-Verde, Kinta dadeer (20/11/2025), hale’u tuku 04:00 Otl.

Lee Mós: Ema Sona Membru CSP Ida iha Vila-Verde, Identifika Suspeitu Na’in-hitu

Polísia asegura suspeitu na’in-hitu iha sela detensaun. Foto/PNTL

Ministru Interiór Francisco da Costa Guterres, afirma agora daudaun investiga no  buka tuir hela kazu referé,  hetan autór sira ne’e prontu bá hatáa tanba hahalok  ne’e hatudu katak indisiplinadu, hatudu katak sira komete ona krime, sé sira komete krime, sira tenke bá hatán iha tribunál tanba justisa.

“Bainhira justisa deside oinsá tenke kumpre, mas ita buka para kazu sira hanesan ne’e labele akontese tán, iha ne’e Polísia Nasionál Timor-Leste (PNTL) tenke foti medida, bá kualkér joven mak ameasa  autór ordem públika,” Ministru Interiór Francisco da Costa Guterres bá jornalista sira iha Parlamentu Nasionál, Kinta (20/11/2025).

Membru Governu ne’e espliká PNTL ne’e autór ordem públika, kualkér ema sé de’it, joven buka atu estraga nia mós iha lejitimidade autodefeza, ne’e lei iha  bolu dehan prosedementu legál no iha prosedementu operasionais hakerek hela, mais tenke kuidadu para labele rezulta vitima, no buka tuir autór sira ne’e tenke impoin bá regra ne’ebé iha.

“Ida-ne’e mak ita buka para tenke prevené  para labele akontese tán, ita sei foti medida forte bá sira ne’e aviza kedan kualkér hanoin ruma mak hanesan ne’e tenke foti kedan medida forte para bele hapara situasaun,” nia tenik.

Jornalista : Zita Menezes