Motór 72 Ne’ebé Polísia Asegura Liu Ona Loron 90 Entrega Ba Patrimoniu Estadu

Hatutan.com, (02 Dezembru 2025), Díli-Komandu Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes, hateten Polísia identifika motór unidade 72 ne’ebé mak komete infrasaun no laiha  dokumentu bainhira liu ona prezu  loron 90 sei halo prosesu lelaun  no entrega ba Patrimóniu Estadu.

Motór hirak ne’e Polísia asegura atu entrega ba Patrimóniu Estadu atu halo lelaun. Foto/Juvinal Cabral dos Santos

“PNTL Díli liuhusi Seksaun Tránzitu Rodoviariu prende motorizada sira ne’ebé mak komete infrasaun ka dokumentu la iha hamutuk 72 atu prosesu ba lelaun ka entrega ba patrimoniu estadu,” Superintendente Xefe Polísia Orlando Gomes, ba jornalista sira iha eskuadra Dom Aleixo, Díli, Tersa (02/12/2025).

Komandu munisipiu Díli, afirma motor 72 ne’e identifika ona katak sira balun viola infrasaun, la iha dokumentu tuir Leí katak liu ona loron 90  tenke prosesu ona ba lelaun.

“Ita-nia tranzitu halo koneksaun ho ita-nia patrimoniu estadu para oinsá mak ninia prosesu serimonia entrega motór 72 ne’e ba patrimoniu estadu. Motór 72 ne’e ita prende iha tinan ida ne’e (2025) nia laran, ita prende identifika hamutuk 72 ne’ebé mak viola infrasaun,” Orlando Gomes haktuir.

Autoridade seguransa argumenta, nain ba motor trata dokumentus  kompletu nia mai entaun fo fali motór. Maibé, Polísia hein to’o loron-90 la iha ona, nain la mai foti motór signifika ne’e liu ona loron 90 motór ne’e prosesa tama ona iha lelaun.

“Komandu Polîsia Munisípiu Díli hakarak apela ba ita nia sidadaun sira iha kapital Díli katak motór sira ne’ebé mak Polísia prende, ita-boot sira aprezenta dokumentu para nune’e ita boot sira foti fali motor, mais kuandu ita prende ona mak liu ona  90 dias la mai foti ita boot sira nia motor ne’e sei prosesu ba iha lelaun entrega ba iha patrimoniu estadu loke prosesu lelaun”.

Jornalista: Juvinal Cabral dos Santos