Kazu Abuzu Seksuál Ne’ebé Viral, PNTL Hein Mandadu Ba Suspeitu JGPR iha Indonézia

Hatutan.com, (22 Janeiru 2026), Díli-Polísia Nasionál Timor-Leste (PNTL) submete ona ba Ministeriu Públiku (MP) NUC:0017/26.DINFT hodi husu mandadu detensaun urjente  ba suspeitu  JGPR ne’ebé daudaun ne’e hala’o estudu iha Indonézia.

Lee Mós: PNTL Asegura Suspeitu Na’in-Haat Ba Kazu Abuzu Seksual Ne’ebé Virál

Portavós interinu Komandu Jerál Polísia Nasionál Timor-Leste (PNTL) Superintendente Asistente Polísia Mouzinho T. Correia (klaran) relata informasaun kona-bá situasaun seguransa iha Timor-Leste, Kinta (22/01/2026). Foto/Média PNTL

PNTL halo identifikasaun ba suspeitu hamutuk na’in-lima, maibé na’in-haat mak Polísia asegura ona ho inisiál CON, JMPA, JGFPS, GAAG, entretantu autoridade seguransa rekoñese  suspeitu ida ho inisiál JGPR halo hela estudu iha Indonézia.

“Loos ita uza kualker maneira ita sei  uza para haruka nia fila-fali mai, iha maneira ita bele kontaktu adidu seguransa, adidu embaixada iha Indonézia haruka nia fila-fali mai hodi submete ba prosesu,” Portavós interinu Komandu Jerál Polísia Nasionál Timor-Leste (PNTL) Superintendente Asistente Polísia Mouzinho T. Correia ba jornalista sira iha  Ministériu Interior (MI),  Kinta(22/01/2026).

Nia salienta, suspeitu ba Indonézia ne’e identifika ona se nia oan, hein mandadu husi Ministeriu Públiku sai sei bolu suspeitu sira hodi detein.

“Tanba mandadu seidauk sai ne’e ita la iha baze ida,  la iha poder ida haruka ema atu fila, mandadu sai ona mak  liuhusi ita nia kolega sira  Servisu Migrasaun para oinsá haruka nia fila fali mai, tanba nia sidadaun Timor-Leste, nia nafatin kumpri Leí Timor-Leste nian,” Superintendente Asistente Polísia Mouzinho T. Correia, informa.

Portavós interinu PNTL Superintendente Asistente Polísia  Mouzinho T. Correia dehan, semana ne’e video ne’ebé  média mós akompaña virál iha média sosiál atu hateten katak Polísia Nasionál Timor-Leste (PNTL) Komandu Munisípiu Díli parte seksaun Vulnerable Polísia Unit (VPU) submete ona kazu ba iha Ministériu Públiku (MP) .

Prosesu ne’e halo separasaun entre individu ho individu seluk ema ida mesmu Polísia nia oan labele lori fali inan aman sai fali suspeitu.

Investigadór husi VPU Komandu Polísia Munisípiu Díli prosesu ne’e la’o tiha ona no husu tan mandadu detensaun urjente,  dadaun Vitima iha fatin seguru.

Jornalista: Juvinal Cabral dos Santos