Joven Ida husi Maubisse Mate Mistériu iha Merkadu Taibessi

Hatutan.com, (19 Fevereiru 2026), Díli– Joven ida ho naran inisiál AXdR no ho idade tinan 33 husi Postu Administrativu Maubisse, Munisípiu Ainaro, Kuarta kalan (18/02/2026), mate mistériu iha haris fatin laran Merkadu Taibessi, Díli.  

Porta-voz interinu Polísia Nasionál Timor-Leste (PNTL) Superintendente Asistente Polísia Mouzinho T. Correia (klaran) relata informasaun kona-ba situasuan jeral Timor-Leste liuhusi konferénsia imprensa, Kinta (19/02/2026). Foto/Juvinal Cabral dos Santos

“Kuarta-kalan, hetan joven ida mate iha haris fatin Merkadu Taibessi nian, prosesu la’o hela, identifikasaun la’o hela,” Porta-voz interinu Polísia Nasionál Timor-Leste (PNTL) Superintendente Asistente Polísia Mouzinho T. Correia, informa ba jornalista sira iha sala konferénsia Ministériu Interiór (MI), Kinta (19/02/2026).

Iha Kuarta-kalan ne’e kedas, Polísia Nasionál Timor-Leste (PNTL) husi Diresaun Servisu Investigasaun Kriminál (DSIK) evakua ona  mate-isin ba mortuáriu Ospitál Nasionál Guido Valadares (HNGV) hodi halo ezaminasaun external.

Kazu Insidente no Asidente Akontese iha Períodu Fulan-Fevereiru

Liuhusi konferénsia imprensa ne’e, Superintendente Asistente Polísia Mouzinho T. Correia relata mós  informasaun relasiona ho kazu sira insidente no asidente ne’ebé akontese iha períodu loron 09 to’o loron 15 fulan-Fevereiru ne’e.

Insidente ne’ebé akontese iha semana kotuk hamutuk 45 no husi númeru insidente ne’e, kazu asaltu sei okupa fatin dahuluk ho númeru kazu 15, tuir fali violénsia domestika (13), furtu (3), asaltu seksuál (2), ameasa (2), arma branka (2), kontra bandu (2), burla (2), omisidiu (1), arte- marsiál (1) no disturbansia jerál kazu ida  (1).

Husi insidente ne’e hamosu tipu krimi oioin, mak krimi ofensa ba integridade simples ho númeru  19, maustratus ba konjuje (7), furtu agravadu (3), arma proibida (2), ofensa ba integridade iha kazu 2.

Asidente tráfiku rodoviaria iha semana kotuk fulan-Fevereiru, tinan ne’e, totál asidente 36, ema mate na’in-3, ema kanek todan na’in-8, totál ema kanek kaman na’in-35.

Jornalista: Juvinal Cabral dos Santos