PNTL Halo Buska no Apreensaun Ba Xinés Na’in-18 iha Fomento I

Hatutan.com, (20 Fevereiru 2026), Díli-Ekipa konjunta kompostu husi Polísia Nasionál Timor-Leste (PNTL)  Diresaun Servisu Investigasaun Kriminál Nasionál (DSIKN),  Servisu Migrasaun no Forensik,  halo buska no apreensaun ba sidadaun estránjeiru ho nasionalidade Xina na’in-18 ne’ebé deskonfia prátika jogu  online Scamming iha área Fomento I, Suku Comoro, Postu Administrativu Dom Aleixo, Munisípiu Díli.

Lee Mós: Ministériu Públiku Kontínua Investiga Kazu Jogu Online iha Otél Oé-Upu

Polísia lori Xinés na’in-18 ba halo identifikasaun iha Komandu Jerál PNTL, Sesta-kalan (20/02/2026). Foto/Juvinal Cabral dos Santos

Informasaun ne’ebé Hatutan.com rekolla husi fontes sira ekipa sekreta  haktuir Xinés  na’in-18  mai Timor-Leste  balun mai hahú iha loron 9-13 fulan-Fevereiru 2026, aluga uma ida ne’ebé oferese husi kazál Timoroan  iha area Fomento I hodi halo instalasaun ba  ekipamentu atu prátika jogu ilísitu online. Nune’e,  Sesta-kalan (20/02/2026),   hale’u tuku 18:06 Otl, ekipa Servisu Informasaun  lokaliza Xinés sira ne’e nia fatin, nune’e halo kedan buska no apreensaun.

Durante prosesu buska no apreensaun ne’e uma na’in ne’ebé Xinés  sira aluga nia uma  la koopera ho ekipa konjunta hodi halo buska no apreensaun. Tanba ekipa konjunta tama derepente ba nia uma ho nune’e lamenta  hodi diskuti malu  ho ekipa konjunta, maibé ikus uma na’in koopera no autoriza ekipa konjunta halo buska no apreensaun.

Iha prosesu buska no apreensaun ne’e, ekipa konjunta hetan brankas osan nian ida, komputadór kaixa  tolu no meza rua, inklui kadeira ne’ebé  prepara atu instala ba  prátika jogu ilísitu online scamming.

Ekipa hetan mós  evidensia warles, starlink ida no  apreensaun ba sidadaun Xineza nain-18 nia dokumentu komprovativu hanesan Pasaporte.

Hafoin  remata buska no apreensaun ba Xinés sira ne’e, ekipa konjunta lori ba iha edifisiu DSIK Komandu  Jerál PNTL Caicoli hodi halo identifikasaun.

Uma na’in kazál Timoroan  ne’ebé fó sira-nia um aba Xinés sira aluga ne’e submeter hotu ba prosesu identifikasaun durante oras-12 iha  DSIKN  Komandu Jerál PNTL hodi submete ba prosesu tuir mai.

Jornalista: Juvinal Cabral dos Santos