Hatutan.com,  (23 Janeiru 2026), Díli– Ministériu Públiku (MP) kontinua halo investigasaun kle’an ba kazu jogu online  ka Scamming centre  iha Otél Oé-Upu, Rejiaun Administrativu Espesiál Oé-cusse Ambeno (RAEOA).

Lee Mós: Kazu Jogu Online iha Otél Oe-Upu, Tribunál Aplika Prizaun Preventiva Ba Arguidu sira

Prokuradór Jerál Repúblika (PGR) Nelson de Carvalho. Foto/Marcelino Tomae

Prokuradór Jerál Repúblika (PGR) Nelson de Carvalho, Sesta (23/01/2026), hateten bá Jornalista sira katak  kazu jogu  online  no scamming centre iha Otél Oé-Upu, RAEOA,  investigasaun la’o hela hodi kontinua rekolla faktu no evidénsia molok submete bá Tribunál kontinua julgamentu.

“Ha’u la ko’alia kona-bá faktu tanba kazu ne’e nia prosesu la’o baibain. Prosesu investigasaun bá kazu jogu online iha Otél Oé-Upu, Oe-cuse,  investigasaun la’o nafatin, sei rekolla faktu hothotu,” PGR Nelson de Carvalho hateten.

Nia  hatutan, kona-bá prazu ezaminasaun bá  objetu sira  ne’ebé Ministériu Públiku delega bá Polísia Sientifiku Investigasaun Kriminál (PCIC) hodi halo ezame, prokurador tutulár prosesu maka bele  mak hatene. Nia la bele halo intervensaun  bá  servisu investigasaun.

Nia esplika, prosesu investigasaun bá kazu jogu online Otél Oé-Upu ne’e presiza lori tempu naruk, tanba kazu ne’e iha RAEOA, prokuradór titulár mós  tenke uza maneira tomak hodi rekolla evidénsia ka halibur faktu sira ne’e.

Husi sorin seluk, portavós PCIC, Mário Tavares hateten andamentu investigasaun kazu jogu online  ka scamming centre, la’o hela, tuir andamentu prosesuál, Ministériu Públiku delega ona bá PCIC hodi kontinua  halo ezaminasaun bá objetu barak ne’ebé antes ekipa  konjunta halo apreensaun.

Portavós PCIC, Mário Tavares. Foto/Marcelino Tomae

“Ami halo hela ezaminasaun bá despozitivu sira ne’e, tanba ita-boot sira hatene katak komputadór lubuk ida ne’ebé ita halo apreensaun ne’e tenke halo  ezame, bá objetu sira barak  ne’ebé iha tinan kotuk  ita halo buska  no apreensaun iha Oé-cusse,”  Mário Tavares hateten bá Hatutan.com  iha Edifísiu PCIC, Kinta (22/01/2026)

Fó hanoin fila fali Tribunal Judisiáriu Primeiru Instánsia Oé-Cusse (TJPIO) aplika medida koasaun prizaun preventiva arguidu sira ne’ebé deskonfia envolve iha jogu online iha Otél Oe-Upu, Rejiaun Administrativu Epesiál Oé-Cusse Ambeno (RAEOA).

Rezultadu operasaun iha Otél Oe-Upu RAEOA husi PCIC  ho Servisu Nasionál Intelijensia (SNI),  Segunda kalan to’o Tersa, 25-26 fulan-Agostu 2025, konsege halo apreensaun ba ekipamentu ne’ebé fasilita jogu online no online scamming, inklui  desktop hamutuk 86, Laptop 13, Telemovel 194, asesu oioin Wifi ida (1),  Starlink rutel rua (2) no sim Card  135   husi operador balun iha Timor laran.

Halo mós aprensaun bá iha  krime burla informátika  ne’e maka hanesan Desktop 54, Laptop haat (4), headphone  54, asesu poin, telemovel 44,  mákina sura osan ida (1),  no mós inpesor ida.

Suspeitu na’in-10 ne’ebé PCIC ho SNI halo detensaun    kompostu husi sidadaun estranjeiru ho nasionalidade Xina nain-ualu (8),  Indonéziu na’in-ida ho sidadaun Malázia na’in-ida ne’ebé  aprezenta bá Ministériu Públiku.

Liuhosi audénsia primeira interrogatóriu iha Tribunal Judisiáriu Primeiru Instánsia Oé-Cusse (TJPIO) aplika medida koasaun prizaun preventiva arguidu sira ne’ebé envolve iha jogu online iha Otél Oe-Upu, RAEOA.

Arguidu sira ne’e  hamutuk na’in-neen kompostu husi arguidu na’in-lima no arguida na’in-ida mesak sidadaun estranjeiru,  na’in-ida (feto) ho nasionalidade Nepal, no na’in-ida seluk ho nasionalidade Indonézia.

Jornalista: Marcelino Tomae