Suspeitu RM Ba Kazu Violasaun Seksuál Hasoru Menoridade Halai Husi NTT Mai Subar iha Timor-Leste

Hatutan.com, (24 Fevereiru 2026), Dili—Suspeitu prinsipál ba kazu violasaun seksuál hasoru menoridade ho inisiál RM la koopera hodi halai husi invetigasaun autoridade  Polísia Nusa Tenggara Timur (NTT)-Indonézia, mai subar iha família balun iha Tasi-Tolu, Díli.

Lee Mós: Ema ho Podér Polítiku Proteze no Fó Kondisaun Ba Fujitivu Kalumban Mali iha Timor-Leste

Polísia Nasionál Timor-Leste asina nota termu entrega fujitivu RM hodi entrega ba Polìsia Belu, NTT-Indonézia iha Postu Fronteira Motain, Tersa (24/02/2026). Foto/Espesiál

Sita husi mídia oioin Indonézia nian, katak investigadór sira hosi Unidade Investigasaun Kriminál Polísia Belu-NTT buka hela  RM ne’ebé koñesidu mós ho naran Roy, ne’ebé maka sai hanesan suspeitu prinsipál ba kazu alegadu violasaun seksuál ba menoridade hamutuk ho nia asosiadu na’in-rua seluk tan ho inisiál RS ho PK.

RM konsidera la koopera hafoin la kumpre investigadór sira-nia notifikasaun la ho razaun válidu.

Xefe Polísia Belu, Asistente Komisáriu Polísia, I Gede Eka Putra Astawa, konfirma katak, investigadór sira pronúnsia ona naran suspeitu na’in-tolu ba kazu ne’e ho naran insiál RM, RS, no PK.

“Naran suspeitu na’in-tolu ne’e bazeia ba rezultadu aprezentasaun kazu no prezensa pelumenus prova rua ne’ebé válidu,” Xefe Polísia Belu ne’e hateten, Sábadu (21/02/2026).

Kazu ne’e hahú ho relatóriu polísia ne’ebé Polísia Belu simu iha loron 13 fulan-Janeiru 2026, ho númeru LP/B/12/I/2026/SPKT/Polres Belu/Polda NTT.

Informasaun ne’ebé iha katak kazu violénsia seksuál ba menoridade ne’e alegadamente akontese iha Domingu, 11 fulan-Janeiru 2026, haleu tuku 4:00 oras Indonézia iha otél ida iha Sidade Atambua.

Vítima nu’udar estudante sekundária ho inisiál ACT (tinan 16) no bazeia ba investigasaun inisia katak, akontesimentu ne’e hahú bainhira lezada ho suspeitu sira konsumu hela tua iha kuartu otél.

Iha loron 19 fulan-Janeiru 2026, kazu ne’e eleva hosi faze pré-investigasaun ba faze investigasaun hafoin konferénsia kazu nian.

Durante investigasaun, investigadór sira kestiona sasin balun, halo ezame post-mortem (visum et repertum) ba vítima, rekolla evidénsia, inklui evidénsia eletrónika, no koordena ho Ministériu Públiku no Diresaun Hakbiit Feto no Protesaun Labarik iha Polísia NTT.

Suspeitu sira hetan akuzasaun tuir Artigu 81 alínea (2) hosi Lei Númeru 17 tinan 2016 kona-ba Protesaun Labarik ka Artigu 473 alínea (4) hosi Kódigu Penál, ne’ebé altera hosi Lei Númeru 1 tinan 2026 kona-ba Ajustamentu Penál, no Artigu 415 letra b hosi Kódigu Penál Indonézia ho ameasa kastigu másimu tinan 15 prizaun.

Iha Tersa (24/02/2026), haleu tuku 14:00 Otl, Autoridade Seguransa Timor-Leste repatria suspeitu prionsial ho insiál RM ne’ebé halai husi NTT no tama ilegalmente ba Timor-Leste liuhosi Munisípiu Bobonaro.

 Komunikadu ofisiál  ne’ebé Hatutan.com asesa, haktuir hafoin suspeitu refere halai sai husi Indonézia mai Timór-Leste hodi hakat fronteira terrestre liu dalan illegal, Autoridade Seguransa NTT-Indonézia  halo kedas koordenasaun intensivu ho Komandu Jerál PNTL liuhosi DSIP (Diresaun Servisu Informasaun Polísia) no menus husi loron-tolu (3), suspeitu ho inisiál RM ne’e hetan kapturasaun iha rezidénsia familiá nian iha área Tasi-Tolu no entrega kedas ba Servisu Migrasaun hodi halo idenitfikasaun.

Iha prosesu identifikasaun Suspeitu RM hela iha kampung Halirem, Desa Lirak, Kecamatan Atambua Selatan, Kabupaten Belu, ne’ebé halai mai Timor iha loron 29 fulan-Janeiru no hetan kapturasaun husi PNTL iha loron 23 fulan-Fevereiru 2026.

Bazeia ba kooperasaun di’ak entre autoridade Seguransa Indonézia no PNTL, Tersa (24/02/2026), Servisu Migrasaun Timor-Leste ofisialmente entrega hikas suspeitu RM ba Migrasaun Indonézia nian iha Batugade hodi submete ba prosesu investigasaun.

Prosesu haruka fila (repatria) sidadaun Indonezia  ne’e lidera hosi Diretór Jerál Servisu Operasaun no akompaña mós hosi Adidu Seguransa Embaixada Repúblika Indonézia nian iha Díli,  Konsuladu Timór-Leste iha Kupang, Adida Migrasaun iha Atambua, Komandante Unidade Patrullamentu Fronteira  no mós Komandante Postu Servisu Migrasaun Batugade.

Jornalista: Juvinal Cabral dos Santos