Polísia Halo Buska no Apreensaun Ba Armajen Y&W iha Bidau Hetan Osan Falsu Millaun US$4-Resin

Hatutan.com, (14 Abríl 2026), Díli-Polísia Nasionál Timor-Leste liu husi Diresaun Servisu Ivestigasaun Kriminál (DSIK), Kuarta (15/04/2026), tuku 10:00 dadeer Otl, halo buska no apreensaun ba iha armajen Y&W  iha área Bidau Santana nian no hetan osan falsu ho montante millaun US$4-resin.

Lee Mós: TDD Aplika Proibisaun Auzénsia Bá Arguidu Lori Osan Falsu

Polísia halo buska no apreensuan ba armajen iha Bidau Santana hetan osan falsu ho montante millaun US$4-resin. Foto/Juvinal Cabral dos Santos

Atuasaun Polísia nian ne’e ho baze delegasaun kometénsia husi Ministériu Públiku (MP) ho NUK: 0138/26-PNSIC.

Hatutan.com ne’ebé akompaña prosesu  buska no apreensaun  iha armajen Y&W iha Aldeia Sagrada Família, Suku Bidau Santana, Postu-Administrativu Kristu-Rei, Munisípiu Díli,  nota katak osan falsu kuaze millaun US$4-resin iha armajen tau iha brankas lima (5) ne’ebé sei mamuk no kaixa boot  haat tau osan falsu hodi hakerek iha leten meas iha laran hamutuk paket 158t ne’ebé kada paket osan falsu ho montante US$100.00 futun tolu no deskonfia totál osan falsu iha kada paket  US$30,000.00.

Hafoin autoridade  Polísia halo tiha buska no apreensaun ne’e  lori kedas evidénsia  ka prova osan falsu no asegura sidadaun Xinés na’in-tolu no  sidadaun Indonéziu na’in- ida hanesan traballador ba loja Y&W submeter ba indentifikasaun no investigasaun iha edifisiu Diresaun Servisu Investigasaun Kriminál Kuartel Jerál PNTL.

Bainhira lori evidénsia to’o iha edifisiu DSIK Komandante Jerál Komisariu Asistente Polísia Afonso dos Santos no segundu Komandante-Jerál Komisaria Asistente Polísia Natércia Eufrazia Soares Martins, haree rasik bprova sira ne’ebé parte sira rekolla iha terrenu no hato’o apresiasaun boot ba servisu DSIK nian ne’ebé bele asegura osan falsu ho montante ne’ebé boot.

Komandu Jerál PNTL fó  mós orientasaun atu buka tuir nafatin fatin balun ne’ebé rai osan falsu sira ne’e.

Jornalista: Juvinal Cabral dos Santos