PM Xanana Sei Bá Singapura Partisipa Negosiasaun Fronteira Marítima ho Indonézia

Hatutan.com, (23 Abríl 2026), Díli–Primeiru-Ministru (PM), Xanana Gusmão,  Sabádu 25 Abríl ne’e, halo viajen bá Singapura hodi partisipa  negosiasaun fronteira marítima ho Indonézia ba faze datoluk nian.

Lee Mós: Finaliza Fronteira Marítima TL-RI ho Espíritu Amizade no Kooperasaun

Xefe Governu ho Xefe Estaud hasoru malu iha Palásiu Prezidensiál, Kinta, 23 Abríl 2026. Foto/Mídia GPM

Diskusaun  no negosiasaun fronteira marítima RDTL-RI iha faze dahuluk (ronda dahuluk) hala’o tiha ona iha loron 19-20 Agostu 2025. Nune’e, parte RDTL-RI konkorda kona-bá prinsípiu orientadór no troka pozisaun abertura nian.

Negosiasaun ronda daruak nian hala’o iha loron 08-10 Dezembru 2025 iha Jogjakarta no parte rua (RDTL-RI) diskute kestaun tékniku no jurídiku ho espíritu konstrutivu.

Tuir ajenda ba negosiasaun ronda datoluk nian hala’I iha Singapura iha loron 25-Abríl 2026.

 Governu Timor-Leste nafatin komprometidu ba rezolusaun pasífika ba nia fronteira marítima sira tuir lei internasionál no Konvensaun Nasoins Unidas kona-ba Direitu Tasi nian (UNCLOS, sigla Inglés). Ronda negosiasaun fronteira marítima ne’ebé sei mai subliña dedikasaun kompartida husi Timor-Leste no Indonézia atu mantein estabilidade rejionál, kaer metin lei internasionál no haburas relasaun viziñu ne’ebé di’ak.

Primeiru Ministru Kay Rala Xanana Gusmão,  bá  Jornalista sira hafoin remata enkontru semanál ho Prezidente Repúblika, José Ramos Horta iha Palásiu Prezidensiál, Kinta (23/04/2026), hateten negosiasaun ronda datolu ne’e,  husu boot, buat parte sira bele komprende malu, husu boot ronda ida ne’e bele fó hanoin ruma ba malu.

Xefe Governu ne’e afirma, tanba  estadu lakon hela  mil miloins dollár iha tasi Timor laran,  hanesan fó sai   husi média katak Polísia Nasionál Timor-Leste (PNTL), liu-husi Unidade Polísia Marítima,  kaptura  peska ilegál.

Nia afirma,  Timor-Leste    seidauk iha rekursu  iha kapasidade atu kontrola didi’ak  tasi Timor , nune’e maka kuarta  horsehik mós Governnu  diskute iha Konsellu Ministru hodi husu bá polísia atu forma  Polísia Marítima  bele kaer ró boot sira.

Timor-Leste fahe fronteira marítima ho Austrália no Indonézia.  Iha Marsu 2018 Timor-Leste no Austrália asina akordu ida iha Nasoins Unidas iha Nova Iorke ne’ebé halo delimitasaun ba sira-nia fronteira marítima.  Akordu ne’e hetan liuhusi prosesu Konsiliasaun Obrigatóriu UNCLOS nian.  Negosia fronteira marítima ho susesu ho Indonézia sei permite Timor-Leste atu kompleta nia soberania marítima no direitu soberania, ne’ebé importante tebes ba governasaun efetiva, konservasaun tasi, jestaun rekursu no seguransa nasionál Timor-Leste nian.

Jornalista: Marcelino Tomae