Hatutan.com, (11 Outubru 2023), Bali-Primeiru-Ministru Repúblika Demokrátika Timor-Leste  no Xefe Negosiadór Primsipál bá Delimitasaun Fronteira Marítima, Kay Rala Xanana Gusmão, hakarak finaliza ka hakotu fronteira marítima entre Timor-Leste  (TL) ho Repúblika Indonézia (RI) ho espíritu amizade no ho kooperasaun.  

Lee Mós: Jokowi Simu Xanana iha Forum AIS Bali

PM Xanana Gusmão halo intervensaun iha AIS Forum iha Nusa Dua, Bali, Kuarta (11/10/2023). Foto/Mídia GPM

PM Xanana Gusmão kontinua afirma nia hanoin  ida-ne’e durante hato’o nia diskursu iha Forum Estadu Arkipelájiku ka Archipelagic and Island States Forum (AIS Forum) iha Nusa Dua, Bali, Kuarta,  (11/10/2023).

Jornalista Hatutan.com, Rogério Pereira Cárceres, ne’ebé partisipa iha forum ida-nee hosi Nusa Dua, Bali, relata katak iha ámbitu forum internasionál ne’e, Xanana  friza akordu konsiliasaun obrigatóriu bá dahuluk Unclos ne’ebé akontese ho Austrália.

“Agora ami buka atu finaliza ami-nia fronteira marítima ho Indonézia ho espíritu amizade no kooperasaun. Bainhira ita remata tiha ona negosiasaun sira-ne’e ho Indonezia, ita bele haree projetu peska sustentável sira iha ita-nia tasi no ajuda hapara peska ilegál ne’ebé estraga ita-nia biodiversidade tasi nian,” Xanana Gusmão, hateten.

“Ami mós kolabora ho Indonézia hodi harii parke tasi nian ida bá jestaun sustentável bá ita-nia tasi. Ha’u hakarak ida-ne’e sai hanesan Parke da Pás, la’ós de’it tanba ninia valór simboliku maibé atu reflete ninia importánsia hodi konserva ita-nia biodiversidade no dezenvolvimentu komún,” Xanana hateten.

Timor-Leste no Indonézia lokaliza iha Triangulu Koral, área ida-ne’ebé iha diversidade biolójika tasi nian ne’ebé aas liu iha mundu. Indonezia harii ona parku nasionál furak barak, inklui Parku Nasional Komodo ne’ebé besik tebes TL.

“Iha Timor-Leste, ami dezenvolve ekonomia azúl, hanesan dalan seluk bá dezenvolvimentu. Inisiativa sira hanesan AIS Blue Hub, Sentru Peskiza no Dezenvolvimentu no Indise Dezenvolvimentu Ekonomia,”  Xanana hateten.

Ilha Atauro, ne’ebé dook kilómetru 30 hosi kapitál Dili, simu bee biodiversu balun iha mundu.

AIS Forum iha Nusa Dua, Bali, Indonézia, Kuarta (11/10/2023). Foto/Mídia GPM

PM Xanana afirma, dadaun ne’e, TL harii hela Sentru Peskiza no Edukasaun Mariñu ida iha illa Atauro no prepara hela atu deklara bee sira ne’ebé hale’u illa ne’e parke nasionál ida.

“Kolega sira, forum ida-ne’e hanesan oportunidade di’ak ida atu hatama ligasaun bá tasi-ibun no servisu hamutuk hodi alkansa dezenvolvimentu sustentável no konservasaun tasi-ibun,” Xanana subliña.

“Ha’u konklui hodi fó tan ha’u-nia apresiasaun bá líder Indonézia sira tanba fasilita kolaborasaun entre Estadu Arkipelájiku no Illa sira kona-bá tema “Ba ita-nia Oseanu no ita-nia Futuru”! Obrigadu barak,” Primeiru Ministru RDTL tenik. ***