Timor-Leste ho Austrália Hametin Kooperasaun iha Área Defeza

Hatutan.com, (20 Maiu 2026) Díli-Ministériu Defeza (MD) Timor-Leste Kontra-Almirante, Donaciano do Rosário da Costa Gomes ho  Vise-Primeiru Ministru no Ministru Defeza Austrália, Honorable Richard Marles, Kuarta (20/05/2026), iha Miniteriu Defeza Timor-Leste, asina akordu kooperasaun bilaterál iha área defeza.

Vise-Primeiru Ministru no Ministru Defeza Austrália, Honorable Richard asina akordu kooperasaun ho Ministériu Defeza (MD) Timor-Leste Kontra-Almirante, Donaciano do Rosário da Costa Gomes, 20 Maiu 2026. Foto/Juvinal Cabral dos Santos

Ministru Defeza (MD) Kontra-Almirante, Donaciano do Rosário da Costa Gomes, hateten Vise-Primeiru-Ministru  no Ministru Defeza Austrália, Honorable Richard  vizita Timor-Leste iha ámbitu komemorasaun loron restaurasaun independénsia ba dala-XXIV, 20  Maiu 2026, no aproveita hametin komunikasaun no kooperasaun inkluzivamente iha área defeza.

“Momentu ne’e mós ita diskuti forma oinsá mak atu bele hametin di’ak liután ita-nia relasaun iha ámbitu kooperasaun no ami mós konkorda ona hodi asina akordu bilaterál ida entre ami, depois sei dezenvolve akordu ne’e iha futuru para hametin liután formatu sira seluk ne’ebé mak besik liután rai rua ne’e,” Ministru Defeza, Kontra-Almirante, Donaciano do Rosário da Costa Gomes hateten.

Ministru Defeza afirma, husi asina akordu ne’e parte rua nafatin kontinua servisu hamutuk ba oin, para bele defende interese no hakarak ida ne’ebé mak hamutuk ba rai rua ne’e ninia.

Iha fatin hanesan, Vise-Primeiru Ministru no Ministru Defeza Austrália, Honorable Richard Marles, sente honradu tanba bele hasoru malu ho Ministériu Defeza Timor-Leste hodi diskuti no fó hanoin ba malu liga ho interese rai rua ne’e ninia liu-liu iha área defeza.

Ministru Defeza Austrália hatutan, tanba nasaun rua ne’e iha domin boot ba malu, no mós nasaun vizinu nune’e merese atu fahe interese ba malu.

“Ita-nia diskusaun ohin ne’e marka pozitivu tebes, depois ita haree asuntu seluk tan liu-liu kona-ba akordu defeza nia, ne’ebé mak antes ne’e mós ita hala’o hotu ona. Ida-ne’e Pasu ne’ebé pozitivu tebes ne’ebé mak ita sei esforsu hodi realiza iha mandatu sira-ne’e. Liuhusi asina akordu sira-ne’e ami optimista tebes atu realiza servisu sira liga ba área defeza nia iha parte rua,” ezekutivu Austrália nian ne’e tenik.

 Jornalista: Juvinal Cabral dos Santos