Timor-Leste Lutu Nasionál Loron Hitu Ba Falesimentu Eis-Prezidente Repúblika Francisco Guterres Lú-Olo

Hatutan.com, (22 Juñu 2026) Díli-Vise-Primeiru-Ministru no Ministru Koordenadór Asuntu Sosiais, Mariano Assanami Sabino, informa, Governu   liuhusi Konsellu Ministru (KM) extraordinariu, Segunda (22/06/2026), dekreta lutu nasionál durante loron hitu relasiona falesimentu eis-Preizdente Repúblika Francisco Guterres “Lú-Olo”.

Lee Mós: Ramos-Horta Hato’o Sentidu Kondolénsia no Garantia Onra Estadu Bá Patriota Lú-Olo

Palásiu Prezidensiál hasa’e bandeira meia haste nu’udár sinál lutu nasionál ba felesimentu eis-PR Francisco Guterres Lú-Olo. Foto/Média GPR

“Inan-aman povu Timor-Leste tomak, ita rona hodi kalan kedas notísia ne’ebé tristeza tebes ba ita hotu, ita nia lutadór ida ne’ebé hakotu iis  iha Malázia,” Vise-Primeiru-Ministru no Ministru Koordenadór Asuntus Sosiais, Mariano Assanami Sabino hateten liuhusi Konferénsia Imprensa iha Palásiu Governu, Segunda (22/06/2026).

Nu’udar Primeiru Ministru interinu hamutuk ho Ministru Asuntu Kombatentes Libertasaun Nasionál (MAKLN) ,Gil da Costa Monteiro “Oan Soru” fó sai ba públiku kona-bá lutu nasionál.

“Ita hotu sei halo lutu nasionál iha loron hitu oras uituan tan hale’u tuku 10:30 Otl, ami sei halo extraórdinariu Konsellu Ministru para dekreta. Ita hotu sente lakon ita nia kompatriota, ita-nia kamarada, ita-nia komandante,” Assanami hateten.

Nia hatutan, Governu orienta bá ho lideransa ministru nian atu organiza vó espesial, aviaun espesial aban  maktoban Lú-Olo sei to’o iha Timor-Leste.

“Ita uja ita nia aviaun Aero Dili ne’ebé mak uza mós ita nia Bandeira mais ne’e aluga espesial, ema seluk la sa’e, só de’it mate isin hamutuk ho família, sei mai iha ne’e,” Vise-Primeiru Ministru  ne’e informa.

Vise-PM afirma, reprezenta IX Governu konstitusionál hato’o kondolénsia kle’an ba família boot partidu FRETILIN no ba Povu Timor-Leste.

“Ita hotu sente lakon no ita hotu nia orasaun importante,  fó korajen família ba oan sira para mantein firme estuda aprende nafatin hakat nia aman nia ain fatin, no fó korajen ba família ita hotu nia orasaun akompaña maun Lu ninia klamar ba Nai Maromak nia sorin koana”, dehan Assanami.

Iha fatin hanesan Ministru Asuntu Kombatentes Libertasaun Nasionál (MAKLN) Gil da Costa Monteiro “Oan Soru” hateten, hanesan veteranus sente lakon lideransa ida, lideransa ida ne’ebé mak luta durante tinan 24, hamutuk ho nia povu nunka hakruk bá polítika invazor sira nia to’o Timor-Leste ninian independensia.

“Ita haree ba Restaurasaun Independensia tinan 24 kooresponde ho luta libertasaun nasionál no luta libertasaun pátria tinan 24 nia husik ona ita hanesan Timor-oan espesialmente hanesan veteranus no hanesan mós Ministru ne’ebé mak tutela bá iha MKLAN lakon.”

Ministru Oan Soru haktuir, Maun Lu-Olo sofre moras ba halo tratamentu aban halo fulan ida, nia sai husi Dili iha dia 23 fulan-Maiu no horikalan ita rona fali notísia tristeza.

“Tanba ne’e, ita sira ne’e hotu-hotu la’ós Maromak, ne’ebé prontu ida ne’e mak destinu Maromak mak hatene, mais husu ba família sira no ha’u nia bin mana  Cidalia ne’ebé akompaña maun Lu-Olo nia isin agora dadaun sei iha Malázia. Ba família no kolega sira hotu lalika hanoin bara-barak tanba estadu iha dever moral  no hanesan Ministériu MKLAN iha responsabilidade tomak aban atu akompaña maun Lu-Olo nia isin to’o iha Aeroportu Internasionál Prezidente Nicolau Lobato, Comoro sei lori mai to’o iha maun Lu-Olo nia rezidensia” MKLAN afirma.

Ministru hatutan, ohin MKLAN mós liu iha rezidensia haree no orienta kedas  Sekretáriu Estadu mós agora daudaun hamutuk hela ho família sira iha rezidensia para atu kontinua preparasaun.

“Ha’u mai agora tuir orientasaun señór Primeiru Ministru em Ezersisiu ninian, ne’ebé iha ne’e hela konvoka reuniaun KM extraordinariu hodi bele dekreta Bandeira meia aste ka lutu nasionál”, Ministru Oan Soru esplika.

Jornalista: Juvinal Cabral dos Santos