Hatutan.com, (22 Juñu 2026), Díli-Prezidente Repúblika, José Ramos-Horta hato’o sentidu kondolénsia bá família, lideransa, kuadru no militante sira husi FRETILIN, no garantia Estadu sei fó onra bá FRETILIN tanba  matebian eis-Prezidente Repúblika no  atuál Prezidente FRETILIN, Francisco Guterres Lú-Olo.

Lee Mós: Eis-Prezidente Francisco Guterres Lú-Olo Hakotu Iis iha Malázia

Maktoban Francisco Guterres Lú-Olo ho PR José Ramos-Horta. Foto/dok.Espesiál

Komunikadu ofisiál ne’ebé Hatutan.com asesa, Segunda (22/06/2026,) haktuir informasaun ne’ebé nia simu katak estadu klíniku Lú-Olo grave tebtebes.

“Ba nia espoza, oan sira, no membru família tomak, bá lideransa, kuadru sira, no militante sira FRETILIN nian, ha’u hato’o ha’u-nia sentidu kondolénsia sinseru liu kona-bá eis-Prezidente Francisco Guterres Lú-Olo nia mate iha ospitál ida iha Malázia,” Xefe Estadu hateten.

Ramos-Horta hatutan, banhira nia simu notísia ne’e ho triste tebes no konsidera  Eis Prezidente Repúblika Francisco Guterres Lú-Olo nia mate nu’udar lakon boot ida bá Nasaun Timor-Leste.

PR Horta konta, durante nia vizita bá Malázia entre loron 13 to’o 16 Juñu, nia bá vizita Lú-Olo iha sala tratamentu intensivu. Iha ne’ebá nia rona relatóriu médiku kona-bá estadu saúde Lú-Olo husi médiku timoroan ida no mós ko’alia ho nia feen, Cidália Lopes Nobre Mouzinho Guterres.

“Ha’u hetan informasaun kona-bá gravidade husi eis-Prezidente Francisco Guterres Lú-Olo nia kondisaun  gareve . Tanba respeitu bá pasiente no família nia privasidade, bainhira fila mai Dili, ha’u dehan de’it ba jornalista sira katak ha’u ba ospitál hodi husu kona-bá eis-Prezidente Repúblika, Doutór Francisco Guterres Lú-Olo nia saúde, sein elabora kona-bá nia kondisaun,” nia dehan

Nia afirma katak,  privadamente fahe informasaun kona-bá   matebian eis- Prezidente Francisco Guterres Lú-Olo nia kondisaun krítiku ho lideransa másimu partidu nian.

Nia subliña eis-Prezidente Francisco Guterres Lú-Olo nu’udar patriota boot ida, líder sentrál ida bá luta libertasaun nian, líder partidu istóriku FRETILIN nian, no Kaer kargu aas hotu-hotu Estadu nian.

“Ha’u kontaktu ho Embaixadór Timor-Leste iha Malázia atu koordena asaun nesesáriu hotu-hotu, iha koordenasaun ho estrutura família no estadu nian, ba transporte mate-isin mai Timor-Leste. Ha’u mós kontaktu ho Aero Dili, hodi prepara voo espesiál bá transporte mate-isin no membru família sira.

Prezidénsia Repúblika iha koordenasaun ho órgaun estadu sira seluk, sei fó apoiu tomak no onra Estadu nian bá Prezidente Asembleia Konstituenti Francisco Guterres  Lú-Olo.

Jornalista: Marcelino Tomae