PNTL Kaptura Intermediáriu Ne’ebé Bosok Fasilita Ema Atu Ba Servisu iha Austrália

Reportajen: Felix Fernandes 

Hatutan.com, (01 Outubru 2026) Díli-Polísia Nasionál Timor-Leste (PNTL) kaptura intermediáriu ka broker ne’ebé uza utiliza  instituisaun Sekretária Estadu Formasaun Profesionál no Empregu (SEFOPE)  hodi bosok ema atu ba servisu iha Austrália.

Polísia kaptura intermediáriu ka broker ne’ebé bosok ema hatama osan atu ba servisu iha Austrália.

Husi pesoál intermediáriu ka broker nia liman, Polísia rekolla pasaporte 28. Tuir informasaun inisiál husi parte Polísia  katak  vitíma liu ema na’in-20 ne’ebé mak entrega ona osan kada ema entre US$1,000.00 to’o US$2,000.00  ho kompromisu katak, nia fasilita vitíma sira atu ba servisu iha Austrália liu husi SEFOPE.

“Ami kontaktu ami nia inan aman iha foho konsege haruka duni ami rua, ha’u ho ha’u nia rian nian konsege haruka  US$2,600.00, komostu husi ami na’in-ida fó US$1,300.00  ne’ebé ami rua hamutuk US$2,600.00 Depois ami telefone malu ba hasoru malu iha Timor Plaza depois entrega osan iha ne’ebá nia promete iha loron 17 Setembru-ne’e taka vistu, no promete  loron 23 Setembru-ne’e bá Austrália,” vítima haktuir ba jornalista sira iha eskuadra Polísia.

Realidade to’o ohin loron ne’ebé vitíma sera seidauk ba Austrália, maibé nia promete  fali loron 27 Setembru-ne’e hasoru malu iha  Praia dos Coqueiros  depois nia rekolla vítima sira nia foto 3×4 ho pasaporte. Hafoin entrega hotu dokumentu la iha kedas informasaun kontinuasaun to’o ohin loron.

Vitíma konfesa katak afirma, broker ne’e promete hatama sira nia dokumentu sira ne’e atu ba servisu iha Austrália. Maibé, liu husi sira na’in-rua ho alin ba keixa iha DSIK ne’e nia hakarak husu atu devolve sira nia osan ne’ebé durante ne’e hatama ona.

Vítima esplika, hahalok broker sira nune’e bele estraga sistema iha instituisaun, implika ba ema sira ne’ebé tuir teste iha Sekretáriu Estadu Formasaun Profesionál no Empregu (SEFOPE).

Tuir informasaun ne’ebé  husi vitima sira fó ba Hatuta.com, katak broker ne’e promete ba vítima utiliza karta notifikasaun falsu ho eskrita no lansa liu husi WhatsApp hanesan reprezenta ofisiá Gabinete Diresaun Nasional ba Empregu Estranjeru (DNEE)-SEFOPE hodi fó informasaun ba vítima sira.

“Bom dia, husi ofisiais Gabinete Diresaun Nasional ba Empregu Estranjeru (DNEE)-SEFOPE, hakarak informa ba ita bo’ot katak  iha loron 16 fulan-Setembru tinan 2026, sei ba iha salaun Timor Loadge, Comoro Díli, hodi simu informasaun amesmu tempu asinatura kontratu nune’e iha loron 17 fulan-Setembru tinan 2026, ita bo’ot sira sei aranka ba Austrália”, notifikasaun falsu ne’ebé broker ne’e  haruka ba vítima nia WhatsApp.

Entretantu nia informa, traballador sira nia prejensa iha loron ne’ebe mensiona iha leten kada pesoal bele lori de’it familia hanesan ( kaben ka inan-aman), atu nune’e familia bele asiste hamutuk iha loron ida ne’e.

Iha notas ikus husi notifikasaun hateten, presiza informasaun klaru bele kontaktu direitamente  responsavel, (Sr.Rafael). Ikus liu, kona-ba sapeu ho kamizola, sei hetan kontaktu, antes loron rua atu ba asina kontratu. (*)