Ba aktu ida ne’e, Deputada Carmelita Moniz, haree katak, foin ba dala-uluk, proposta ne’ebé bankada CNRT hato’o, rai hela de’it’ iha meza gabinete PN.
Deputada CNRT ne’e haktuir, esperiénsia iha governasaun FRETILIN hato’o proposta kuaze 100 resin, CNRT sempre admite hotu hodi loke diskusaun, no governu bele fahe informasaun detalladu liután ba iha plenária no ba iha públiku bele akompaña.
Advertisement
Iha diskusaun OJE 2022 iha faze espesialidade ne’e, CNRT sente estrañu tanba proposta sira hosi bankada CNRT barak maka bankada Governu la admite ka la rejeita hotu proposta sira ne’e no la justifikasaun ida klaru.
“Ha’u haree justifika rua de’it, maka dehan fora de tempu katak, tama ba oras liu tiha ona maibé seluk laiha justifikasaun la hatene razaun tanba saida proposta sira ne’e la admite. Agora proposta sira ne’ebé admite 100 itál ne’e proposta sira ne’e atu fó aumenta tetu orsamentu aumenta tan osan iha orsamentu jerál estadu, au-mézmu tempu ohin governu foin ko’alia. Ita boot sira mós rona katak governu la konkorda ho aumenta proposta sira-ne’e,” deputada Carmelita Moniz, hateten liuhosi intervensaun iha plenária PN, durante diskusaun espesialidade OJE 2022, Segunda (06/12/2021).
Hatán ba preokupasaun ne’e, Vise Prezidente PN, Maria Angelina Sarmento, klarifika katak, proposta sira-ne’e PPN la admite, tanba proposta sira-ne’e, liu ona hosi oras submisaun nian, tuir giaun debate iha orsamentu jerál estadu nian.
Nia argumenta, PPN Aniceto Guterres la admite atu baixa hodi halo kópia ba deputadu no deputada sira, no bele hetan fatin iha diskusaun espesialidade, liu-liu liña ministériu sira ne’ebé deputadu sira pretende atu halo alterasaun ba proposta orsamentu jerál estadu nian.
“Razaun primeiru liu maka, iha proposta ida ne’e ninia oras de submisaun ne’e liu ona oras ne’ebé prevee iha giaun debate orsamentu jerál estadu. Bazeia ba giaun debate orsamentu jerál estadu, proposta alterasaun sira ne’ebé distinta deputadu sira iha hanoin atu aprezenta, nia tenke submete mai meza do parlamentu, antes finál votasaun jeneralidade,” Vise PPN, Maria Angelina Sarmento, hateten iha PN.
Advertisement
Tuir giaun ne’ebé maka iha konkordánsia ona iha lider bankada sira asina katak, tempu ba submisaun ba proposta alterasaun ne’e, sei la hetan admisaun hosi prezidente parlamentu.