Hatutan.com (15 Janeiru 2022) Díli— Konstituisaun Repúblika Demokrátika Timor Leste (K-RDTL), liuhosi artigu 86, alínea c), fó kbiit ba Prezidente Repúblika (PR) marka data eleisaun prezidensiál no lejislativa.
Prezidente Repúblika, Francisco Guterres Lú Olo. Foto/Média PR.
Bazeia ba artigu 12, númeru 1, hosi Lei númeru 7/2006, 26 dezembru, Lei Eleitorál ba Prezidente Repúblika, ho alterasaun hirak ne’ebé mak halo ona ba Lei ne’e, molok Prezidente Repúblika dekreta data eleisaun prezidensiál, tenke rona uluk Governu no mós partidu polítiku sira ho asentu iha Parlamentu Nasionál.
Prezidente Repúblika Francisco Guterres Lú OLo, liuhosi Dekretu númeru 2/2022, ne’ebé publika ohin iha Jornal Repúblika, marka ona data eleisaun prezidensiál nian hodi hili Prezidente Repúblika ba períodu 2022-2027, iha loron 19 fulan-marsu 2022.
Advertisement
“Bainhira rezultadu eleisaun ne’e hatudu katak la iha kandidatu ida mak konsege hetan 50%+1 (metade ho votu ida tan) hosi númeru total votus válidus, iha eleisaun ne’e, ita sei tuir fali eleisaun daruak,” Hatutan.com sita komunikadu.
Tuir artigu 12, númeru 2, hosi Lei Eleitorál ba Prezidente Repúblika, eleisaun daruak sei halo iha loron tolu-nulu, sura hosi loron eleisaun dahuluk.
Ba eleisaun daruak ne’e, sei la presiza ona iha tán dekretu prezidensiál ba markasaun data eleisaun daruak nian.
Ba eleisaun ida-ne’e, Prezidente Repúblika rona ona Governu, partidu polítiku hotu-hotu ho asentu iha Parlamentu Nasionál, Komisaun Nasionál Eleisaun (sigla iha lian-portugés CNE) no Sekretariadu Tékniku Administrasaun Eleitorál (STAE).