Hatutan.com, (13 Maiu 2024), Díli-Pilar ekonomia Timor-Leste nian sei fraku tebetebes iha prosesu adezaun Timor-Leste nian bá membru permanente  ASEAN (Association of Southeast Asian Nation).

Lee Mós: “Futuru Líder bá ASEAN” Sinál Kompromisu TL Nia Integrasaun Rejionál

Pilar ida ne’ebé hetan konfiansa no  sai orgullu boot no garantia Timor-Leste nia adezaun ne’ebé tuir planu atu akontese iha 2025 mak seguransa rai-laran, inklui pilar seluk tan mak hanesan kulturál no sosiál laiha problema.

Prezidente Repúblika (PR), José Ramos-Horta. Foto/Elio dos Santos da Costa.

“Agora pilar ekonómiku ne’e mak ita sei fraku tanba ita haree ita-nia ekonomia, maibé Timor mós tinan 22 de’it independénsia bainhira hahú zero, ne’e-duni sira mós hakfodak buat barak halo tiha ona tinan 20  nia laran bele aselera tan,” Prezidente Repúblika José Ramos-Horta hateten bá jornalista sira iha Palásiu Prezidensiál, Segunda (13/05/2024).

Xefe Estadu subliña katak iha Timor-Leste problema boot mak infraestrutura, otel, aeroportu, ospitál, klaru rekursu umanu seidauk sufisiente, maibé la signifika tenke halo buat hotu-hotu ohin.

“Ha’u husik bá governu,  Primeiru-Ministru atu hatete bá ha’u, prontu atu halo karta atu ofisializa ita-nia pedidu atu tama ASEAN iha 2025, se governu halo ida ha’u apoia, se governu hanoin atu hadi’a tan tinan ida ka tinan rua ha’u mós apoia tanba Governu mak bele iha vizaun kompleta ba ita-nia dezafiu, kapasidade.” José Ramos-Horta hateten.

Prezidente Repúblika, José Ramos-Horta, kontente ho grupu “Futuru Lider bá ASEAN” ne’ebé hanesan inisiativa husi Ministériu Negósiu Estranjeiru no Kooperasaun (MNEK) ne’ebé halo parte esforsu Governu nian atu  implementa roadmap bá adezaun ASEAN.

Balun hanoin ASEAN ne’e hanesan parte diplomátiku de’it, tuir Ramos-horta la’e, ekonómia mak pilar númeru ida iha ASEAN ne’e integrasaun ekonómika, rejionál komérsiu indústria, teknolojia, floresta, água buat hotu-hotu iha ajenda ASEAN nian.

“Todan tebe-tebes ita rona beibeik Primeiru-Ministru rasik ho ha’u ko’alia ita atu prepara an tama ASEAN iha 2025 ne’e Governu mak loloos tenke halo avaliasaun, se ita prontu duni atu tama iha 2025 ka lae. Ha’u kontente ho inisiativa ida-ne’e, koñese joven sira ne’e hotu-hotu ko’alia lian Inglés moos, balun iha ona esperiénsia maibé seidauk sufisiente bele reprezenta Timor ho dignidade, orgullu ho disiplina,” Ramos-Horta tenik.

Jornalista: Vito Salvadór