Hatutan.com, (14 Maiu 2024), Díli—Aviaun komersiál Timoroan nian, Aero Dili, Sábadu 18 fulan-Maiu 2024, halo inaugural flight ka lansa vou dahuluk bá Rejiaun Administrativu Espesiál Oe-Cusse Ambeno (RAEOA).

Lee Mós: Oé-Cuse Oan iha PN Husu Aero Dili Tulun Povu Oé-Cuse ho Presu Tikete $25

Aviaun Aero Dili Airbus A320. Foto/Aero Dili

Inaugural flight Aero Dili ho aviaun Airbus A320 ne’e hanesan parte kompromisu empreza aéreu nasionál Aero Díli nian ho Governu Timor-Leste, liuliu Autoridade Rejiaun Administrativu Espesiál Oe-Cusse Abeno atu garante konektividade  aéreu hodi substitui aviaun ZEESM ne’ebé prezidente Autoridade RAEOA, Rogério Tiago Lobato  deside suspende nia operasaun tanba presiza halo investigasaun bá prosesu balun.

Daudaun ne’e parte Aero Dili nian halo hela koordenasaun no preparasaun tékniku hotu atu serimónia inaugural flight ne’ebé tuir planu sei halo hosi Primeiru-Ministru (PM), Kay Rala Xanana Gusmão iha Aeroportu Rota do Sândalo-RAEOA.

Iha publikasaun sira iha pájina Aero Dili nian, inklui ajénsia sira fa’an tikete aviaun nian iha Dili komesa ona halo anúnsiu hodi fa’an tikete Díli-Oe-Cusse no Oé-Cusse iha bá loron 18 ho loron 19-fulan Maiu ne’e nian atu pasajeiru sira, liuliu Oe-Cusse oan sira bele aproveita hodi halo vou bá husi Dili bá Oe-Cusse no Oé-Cusse mai Dili.

Tuir oráriu aviaun Aero Dili sei sai hosi Dili bá Oe-Cuse iha loron 18 fulan-Maiu ne’e, hale’u tuku 07:00 dadeer no fila hosi Oé-Cusse mai Díli, hale’u tuku 09:30 dadeer.

Iha fali  loron tuir mai, 19 fulan-Maiu ne’e, aviaun Aero Dili sai husi Díli tuku 07:00 dadeer mo fila fali husi Oe-Cusse tuku 09:30 dadeer.

Kona-bá presu tikete promosaun nian iha inaugural flight ne’e sei fa’an limitadu ho presu $20 kada pasajeiru Dili-Oe-Cusse bá total pasajeiru na’in-40 de’it. Ho nune’e, presu tikete bá-mai Dili-Oe-Cusse $40 kada pasajeiru.

“Billete ka tikete  nia folin hahú husi $20 kada pasajeiru one way bá abitante sira ho kartaun eleitorál Oe-Cusse durante loron rua; 18 ho 19 fulan-Maiu ne’e, katak oferese espesiál bá Oe-Cusse  citizens,” Diretora Jerál Aero Dili, Maria Angela Oliveira, informa hodi responde Hatutan.com, Tersa (14/05/2024).

Iha loron 23 fulan-Janieru 2023, empreza Aero Dili inaugura ligasaun aéreu ba dahuluk entre Dili-Denpasar, Indonézia  liuhosi serimónia ne’ebé hala’o iha Otel Timor partisipa husi Primeiru-Ministru atuál ne’ebá Taur Matan Ruak ho membru VIIII Governu Konstitusionál sira.

Iha loron 20 fulan-Marsu 2023, aviaun Airbus A320 Aero Dili nian halo inaugurasaun iha Aeroportu internasionál Prezidente Nicolau Lobato no vou dahuluk bá Denpasar-Indonézia iha loron 28 fulan-Marsu 2023.   

Iha fali loron 24 fulan-Fevereiru 2024, aviaun Aero Dili ho na’in Timoroan, Lourenço de Oliveira,  lansa vou dahuluk bá Singapura ne’ebé Prezidente Repúblika, José Ramos-Horta ho Ministru Negósiu Estranjeiru no Kooperasaun, Bendito Freitas sai   pasajeiru dahuluk iha  lansamentu vou ne’e.

Lee Mós: Aero Dili Substitui Aviaun ZEESM Semo bá Oé-Cusse

Jornalista: Vito Salvadór