Hatutam.com, (08 Fevereiru 2023), Díli-Dezde 2019 to’o mai 2022, Governu liuhosi Sekretária Estadu Arte no Kultura (SEAK), apoia ona osan bá konstrusaun uma-lisan hamutuk 100-resin iha territóriu nasionál atu bele prezerva patrimóniu sira kulturál nian.
Uma-lisan iha Aldeia Malhara, Suku Muapetin, Postu Administrativu Lospalos, Munisípiu Lautem. Foto/Elio dos Santos da Costa
Sekretáriu Estadu Arte no Kultura (SEAK), Teófili Caldas, hateten apoiu Governu nian bá iha komunidade lokál sira ne’e, fahe bá kategória tolu mak hanesan, konstrusaun, rehabilitasaun, no inaugurasaun.
Uma-lisan sira ne’ebé tama iha kategória konstrusaun nian, SEAK atribui osan ho montante $3,500 kada uma-lisan. Iha kategória rehabilitasaun hetan $2,500 kada uma-lisan no iha faze unaugurasaun fó apoiu $1,500 kada uma-lisan.
Advertisement
“Governu labele halo uma-lisan bá lisan sira, mas Governu ajuda halo kaman de’it sira,” Teófilo Caldas hateten hafoin partisipa iha sorumutu Konsellu Ministru iha Palásiu Governu, Kuarta (08/02/2023).
Sei Apoia tan Uma-lisan 50
Tuir planu, iha tinan ne’e, SEAK sei apoiu tán orsamentu hamtuk $100,000 bá komunidade lokál sira hodi hadi’a sira-nia uma-lisan hamutuk 50 ne’ebé prioritiza bá uma-lisan sira iha Munisipiu Lautém.
SEAK Teófilo Caldas fó razaun katak, uma-lisan 50 ne’e sei hadi’a uluk iha Lautém, tanba iha fulan-hirak liubá, komunidade sira husu Governu oinsá bele tau matan bá hadi’a uma-lisan sira ne’e, tanba barak mak kondisaun aat ona.
Teófilo Caldas, husu Governu foun ne’ebé atu mai bele prepara fali orsamentu ratifikativu para kontinua fó apoiu bá harii no kondisiona uma-lisan sira ne’e.