Ramos-Horta La Konkorda ho MP Notifika Jornalista Hatutan.com Tanba Produtu Jornalístiku

Hatuta.com, (28 Juñu 2023), Díli- Prezidente Repúblika (PR), José Ramos-Horta, preokupa no la konkorda ho Ministériu Públiku liuhosi Prokuradór Jerál Repúblika (PGR), ne’ebé  halo notifikasaun bá jornalista no Xefe Redasaun Mídia online Hatutan.com relasiona ho reportajen ka produtu Jornalístiku ne’ebé mídia Hatuta.com publika.

Lee Mós : MP Notifika Jornalista Hatutan.com Rogério Pereira Cárceres Hodi Presta Deklarasaun

Xefe Estadu RDTL hato’o ida-ne’e  relasiona ho informasaun ne’ebé publika iha mídia nasionál sira katak Ministériu Publiku notifika jornalista Rogério Pereira Cárceres ho Xefe Redasaun hosi mídia Hatutan.com, Francisco Belo Simões da Costa, hodi presta deklarasaun iha Servisu  Inspesaun Ministériu Públiku iha  Prokuradór Jerál Repúblika (PGR) nian iha loron rua tuituir malu, Kinta ho Sesta, 22-23 Juñu  2023.

Prezidente Repúblika, José Ramos-Horta. Foto/Elio dos Santos da Costa

Iha Kinta, 22 fulan-Juñu 2023, hale’u tuku 15:00 OTL, Xefe Redasaun Mídia Online Hatutan, Francisco Belo Simões, ne’ebé nu’udár membru Conselho de Imprensa de Timor Leste, simu notifikasaun MP nian ho númeru referénsia 84/IMP/2023, ne’ebé asina hosi Sekretaria Inspesaun Ministériu Públiku nian, Eliana Flora Pereira.

Sekretaria Inspesaun Ministériu Públiku  (MP) notifika mós jornalista Hatutan.com, Rogério Pereira Cárceres, Tersa  20 Juñu 2023, hodi bá presta deklarasaun iha Ministériu Públiku, Kinta (22/06/2023).

Notifikasaun bá jornalista Rogério Pereira Cárceres ho Xefe Redasaun Francisco Belo Simões da Costa, baze bá despaxu hosi Inspetora Ministériu Públiku, Dra. Zélia Trindade, atu rona deklarasaun relasiona ho produtu Jornalístiku ne’ebé publika iha Hatutan.com, ho títulu Deskonfia, PGR  Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugál, edisaun 19 fulan-Maiu 2023.

Lee Mós : Xefe Redasaun Hatutan.com Presta Deklarasaun iha MP

Bá jornalista sira iha Aeportu Internasionál Nicolau Lobato, Díli, Kuarta (28/6/2023), Prezidente Repúblika, José Ramos-Horta, hateten nia  la hatene Prokuradór Jerál Repúblika (PGR) nia servisu barak ka lae, se servisu la barak entaun prontu bele bolu jornalista ida sateia para bele PGR nia servisu la barak.

 Nia afirma, Jornalista hakerek buat ruma sala karik ka mesmu jornalista hakerek sala ne’e tamba nia nakar, hakarak hakerek dunik ne’e mos la’ós krime boot ida, lalika lakon fali tempu ho buat sira ne’e.

“Se lori Hatutan.com ba Tribunál, ne’e di’ak liután tamba publisidade boot loos ba Hatutan.com,” Prezidente Repúblika José Ramos-Horta hateten ho oin hamnasa.

Xefe Estadu hatutan, ho  esforsu atu kriminaliza  produtu Jornalístiku ne’ebé Governante ka instituisaun Estadu sira halo bele fó impaktu bá índise  liberdade imprensa Timor-Leste nian iha mundu.

Índise Liberdade Imprensa mundiál tinan 2023 versaun Reportagen sem Fronteira  ka Reporters Without Borders (RSF), Timor-Leste (TL) tama iha kategoria Liberdade imprensa di’ak, ne’ebé okupa númeru 10 hosi nasaun 180 iha mundu tomak.

“Kriminaliza produtu Jornalístiku ne’e bele fó impaktu ba índise liberdade imprensa Timor-Leste nian iha mundu, bele hatún, tamba ne’e ha’u sei ko’alia ho PGR, ha’u lagosta ho kriminaliza produtu Jornalístiku,” Ramos-Horta afirma.

Xefe Estadu subliña kriminaliza produtu jornalistiku la’ós prioridade boot ida iha Timor-Leste tamba ne’e halo servisu seluk ne’ebé importante bá nasaun.

Jornalista: Vito Salvadór